प्रधानमंत्री नरेंद्र मोदीक आगमन पर शनिदिन भाजपा कार्यकर्ता हुनकर स्वागतमे डेढ़ लाख दीप प्रज्वलित केलनि। गुवाहाटी खानापाड़ा पशु चिकित्साक खेल मैदानमे आयोजित स्वागत कार्यक्रममे दीपसँ “वेलकम मोदी जी” लिखल गेल। माटिक दीप प्रज्वलितसँ पूरा खेल मैदान दिवालीक रंगमे रंगि गेल। दीप प्रज्वलित करय वाला कार्यकर्ता सब जय श्रीराम केर नाराक संग -संग मोदी स्वागतम , मोदी स्वागतम केर नारा सेहो लगा रहल छलाह। प्रधानमंत्रीक हार्दिक स्वागत कार्यक्रममे सैकड़ों कार्यकर्ताक उत्साह बढ़ाबै लेल मुख्यमंत्री डॉ. हिमंत विश्व शर्मा, आवास आ शहरी विकास मंत्री अशोक सिंघल , अन्य कतेको मंत्री आ भाजपा नेता सभ कार्यक्रम स्थल पर पहुँचलाह आ दीप प्रज्वलित सेहो केलाह।
दीप प्रज्वलित करयवाली महिला मोर्चाक नेता सब कहलनि जे प्रधानमंत्रीक आगमन हुनका सब लेल दिवालीसँ कम नहिं छैक। ओ कहलनि जे जखन-जखन प्रधानमंत्री असम अबैत छथि तखन-तखन राज्यक लोकक लेल उपहारक गठरी लय कय अबैत छथि। दोसर दिस प्रधानमंत्रीक स्वागतक लेल भारतीय जनता युवा मोर्चाक सैकड़ों सदस्य अलग-अलग जिलासँ बाइक रैली लय कय गुवाहाटी वशिष्ठ स्थित पार्टी मुख्यालय पहुँचल। एहि दौरान भाजपा कार्यकर्ता सभमे गजब केर उत्साह देखल गेल।
