आओर ४९ विपक्षी सांसद लोकसभासँ निलम्बित
शशि थरूर, फारुख अब्दुल्ला, मनीष तिवारी आदि सम्मिलित
*
नई दिल्ली
*
संसदमे चलि रहल हंगामा पर एकटा पैघ कार्रवाईमे मंगलदिन ४९ टा आओर लोकसभा सांसदकेँ निलम्बित कऽ देल गेल अछि।
मनीष तिवारी, शशि थरूर, सुप्रिया सुले, डिम्पल यादव, फारूक अब्दुल्ला, कार्ति चिदंबरम, सुदीप बंदोपाध्याय, दानिश अली, राजीव रंजन सिंह सहित उनचास लोकसभा सांसदकेँ सत्रक शेष अवधिक लेल निलम्बित कऽ देल गेल।
मंगलदिन दुपहरिया १२:३० बजे जखन लोकसभाक तेसर बेर बैसार भेल तखन पीठासीन सभापति हंगामा कय रहल एहि आन्दोलनकारी सांसदसभकेँ नामित कयलनि, संसदीय कार्य राज्य मंत्री अर्जुन राम मेघवाल हुनका सभकेँ निलम्बित करबाक प्रस्ताव रखलनि आ सदनक अनुमोदनक बाद हुनका सभकेँ निलंबित कऽ देल गेल।
तखन लोकसभाक कार्यवाही दुपहरिया २ बजे धरि स्थगित कऽ देल गेल।
सोमदिन सेहो राज्यसभाक ४५ आ लोकसभाक ३३ सहित ७८ सांसदकेँ निलम्बित कऽ देल गेल छल। पछिला सप्ताह १३ लोकसभा आ एकटा राज्यसभा सांसदकेँ सेहो निलम्बित कऽ देल गेल छल। दुनू सदनमे एखन धरि कुल १४१ सांसदकेँ निलम्बित कऽ देल गेल अछि।
निलंबित सांसद सभ छथि :-
वी वेंथिलिंगम, गुरजीत सिंह औजला, सुप्रिया सुले, सप्तगिरि उलाका, अदूर प्रकाश, अब्दुल समद समदानी, मनीष तिवारी, प्रद्युत बार्दोलोई, गिरधारी यादव, गीता कोड़ा, फ्रांसिस्को सारदिन्हा, जगत रक्षम, एसआर पार्तिविवन, फारुख अब्दुला, ज्योत्सना महंत, ए गणेश मूर्ति, माला राय, वेलूसामी, ए चंदकुमार, शशि थरूर, कार्ति चिदबंरम, सुदीप बंदोपाध्याय, डिंपल यादव, हसनैन मसूदी, दानिश अली, खदीदुल रहमान, राजीव रंजन सिंह, डीएनवी सेंथिल कुमार, संतोष कुमार, दुआल चंद्र गोस्वामी, रवनीत बिट्टू, दिनेश यादव, के सुधाकरन, मोहम्मद सादिक, एमके विष्णु प्रसाद, पीपी मोहम्मद फैजल, साजदा अहमद, जसवीर सिंह गिल, महाबली सिंह, अमोल कोल्हे, सुशील कुमार रिंकू, सुनील कुमार सिंह, एचटी हसन, एम धनुष कुमार, प्रतिभा सिंह, थोल थोलमावलम, चंद्रेश्वर प्रसाद, आलोक कुमार सुमन, दिलेश्वर कामतकेँ मंगल कऽ लोकसभासँ निलंबित कयल गेल।
संसदीय कार्यमंत्री प्रहलाद जोशी लोकसभामे कहलनि कि ई तय भेल छल कि सदनमे कियो प्लेकार्ड लऽ कऽ नहिं आओत, मुदा चुनाव हारयसँ आयल अधीरतामे ओ सब एहेन डेग उठा रहल छथि। ईएह कारण अछि कि हमरा प्रस्ताव (विपक्षी सांसदक निलंबन वाला) आनय पड़ि रहल अछि।
