बिहारमे सेहो दौड़त आब द्रुतगतिक बुलेट ट्रेन
पटना
*
आब बुलेट ट्रेन बिहारसँ सेहो गुजरत। बुलेट ट्रेन राज्यक चारि जिलामे रुकत। ओ स्थान जतय स्टेशन बनत, ओकर पहिचान कऽ लेल गेल अछि। एकरा लेल सर्वेक्षणक काज सेहो चलि रहल अछि।
वंदे भारत एक्सप्रेस ट्रेनक बाद आब बिहारमे बुलेट ट्रेन सेहो चलत। नेशनल हाई स्पीड रेल कॉर्पोरेशन लिमिटेड (एनएचएसआरसीएल) बिहारमे बुलेट ट्रेनक रुट जारी कय देलक अछि। बुलेट ट्रेनक स्टेशन बक्सर, उदवंतनगर (आरा) आ गया जिलामे बनाओल जायत। एकरा लेल भूमि सर्वेक्षणक काज शुरू भऽ गेल अछि। आरामे पछिला तीन सालसँ सर्वेक्षणक काज चलि रहल अछि। प्राप्त जानकारीक अनुसार बुलेट ट्रेन दिल्लीसँ हावड़ा जायत। ई ट्रेन पटना, आरा, बक्सर आ गया होइत हावड़ा जायत।
प्राप्त जानकारीक अनुसार बुलेट ट्रेन चलला पर लोक मात्र तीन घंटाक भीतर आरासँ हावड़ा पहुँचि जायत। बक्सरसँ कोलकाताक दूरी लगभग ७०० किलोमीटर अछि। ई तय करयमे मात्र अढ़ाई घंटा लागत। बुलेट ट्रेन चललासँ बिहारसँ हावड़ा जयबामे कम समय लागत। एहिसँ लोकक समयक बचत होयत आ दूरी सेहो कम भऽ जायत। कहल जा रहल अछि जे भूमि अधिग्रहणक काज २०२५ धरि शुरू होयबाक आशा अछि। जँ अधिग्रहित करबाक जमीन पर घर, बोरिंग, गाछ वा किछु आओर अछि तखन मुआवजा देल जायत।
बुलेट ट्रेन दिल्लीसँ लखनऊ आ अयोध्या होइत वाराणसी सेहो जायत। एकरा लेल एतय सर्वेक्षण सेहो कएल जा रहल अछि। वाराणसी-कोलकाता हाई-स्पीड ट्रेन नेटवर्कमे बक्सर आ पटनाक सङ्ग उदवंतनगर (आरा) स्टेशन होयत, जतय बुलेट ट्रेन रुकत। ट्रेनक मार्ग उन्नत, भूमिगत आ जमीन पर होयत जतय पटरी बनत। जानकारीक अनुसार आरा-बक्सरक बीच बुलेट ट्रेनक पटरी ऊँच कयल जायत। ई जमीनसँ लगभग २० फीट ऊपर होएत।
कहल जा रहल अछि जे बिहारमे बुलेट ट्रेनक गति ३५० किमी प्रति घंटा होएत। कम स्टेशन होयबाक कारणे पपनी खसिते आगू निकलि जायत।
