आब प्रधानमंत्री मोदी कयलनि आन्ध्र प्रदेशमे शिव पूजा

अमरावती

*

प्रधानमंत्री नरेन्द्र मोदी राम मन्दिरक उद्घाटनसँ पहिने ११ दिनक विशेष अनुष्ठान पर छथि। एम्हर आन्ध्र प्रदेशक यात्राक क्रममे ओ लेपाक्षीक वीरभद्र मन्दिरमे पूजा-अर्चना कयलनि। प्रधानमंत्री नरेन्द्र मोदी पूजा-अर्चनाक बाद मन्दिरमे रङ्गनाथ रामायणक पाठ सुनलनि। प्रधानमंत्री नरेन्द्र मोदी आन्ध्र प्रदेशक दौरा करबाक लेल पलासमुद्रम पहुँचलाह। तखन ओ अनन्तपुर लेल प्रस्थान कयलनि। प्रधानमंत्री मोदी एतय लेपाक्षी मन्दिरमे भगवान शिवक पूजा कयलनि। प्रधानमंत्री नरेन्द्र मोदी आन्ध्र प्रदेशक विभिन्न कार्यक्रममे भाग लेलाक बाद केरल लेल रवाना होयताह। प्रधानमंत्री मोदी केरलमे विकास काज सभक शुभारम्भ करताह। ओतय प्रधानमंत्री रामास्वामी मंदिर जयताह।

लेपाक्षी मन्दिर आन्ध्र प्रदेशक अनन्तपुर जिलामे स्थित वीरभद्र मन्दिरक नामसँ जानल जाइत अछि। ई कतेको दृष्टिसँ एकटा अद्वितीय मंदिर अछि।

एहि मंदिरमे भगवान शिव अपन क्रूर एवं रौद्र रूपमे विराजित छथि। एही कारणसँ एहि मंदिर केर वीरभद्र मंदिर कहल जाइत छैक। एहि मंदिरक बारेमे कहल जाइत अछि कि ई हैंगिंग पिलर पर टिकल अछि। पछिला सप्ताह प्रधानमंत्री नरेद्र मोदी महाराष्ट्रक नासिकमे स्थित कालाराम मंदिरक सेहो दौरा कयने छलथि। पीएम मोदी तखनि मंदिरमे साफ-सफाई कयने छलथि। पीएम मोदी राम मंदिरक उद्घाटनसँ पहिने देशभरिक मंदिर सभक साफ-सफाई केर अपील कयलनि अछि।