बिहारक राजधानी पटनामे मुख्यमंत्रीक निवासक घेराव करय बला अतिथि शिक्षकसभ पर पुलिस लाठीचार्ज कयलक अछि। सीबीआई कार्यालयक सोझाँ पुलिस शिक्षकसभकेँ रोकि देलक। जे शिक्षक जबरदस्ती आगू बढ़ि रहल छलाह हुनका पुलिस पीछा कऽ बल प्रयोग कयलक। प्रदर्शनकारी अतिथि शिक्षक कहलनि, “हमरासभक संख्या ४२५७ अछि। जखन राज्यमे शिक्षकक कमी छल, तखन हमरे सभसँ सेवा लेल गेल। मुदा हमरा सभकेँ स्थायी करबाक बदला एक झटकामे नोकरीसँ हटा देल गेल। शिक्षक नौकरीसँ हटाबय कारण विरोध प्रदर्शन कए रहल छथि।”
जनतब जे बिहार सरकार अतिथि शिक्षकसँ सेवा लेबासँ मना कऽ देलक अछि। ३१ मार्च हुनकर कार्यकालक अंतिम दिन छल। शिक्षा विभाग हुनका सभकेँ सेवामुक्त कऽ देलक अछि, जकर बाद आइ बिहारक सभ अतिथि शिक्षक घेराव करबाक लेल मुख्यमंत्री निवास पहुँचलाह। पुलिस हुनका सभकेँ बल प्रयोग कय पहिने रोकि देलक आ भीड़केँ हटाबय लेल लाठी चार्ज कयलक। किछु प्रदर्शनकारीकेँ पुलिस हिरासतमे सेहो लेलक अछि। अतिथि शिक्षककेँ हिरासतमे लेबाक एकटा वीडियो सेहो सामने आयल अछि।
बिहारक अतिथि शिक्षक छओ सालसँ विभिन्न उच्च माध्यमिक विद्यालयमे पढ़ा रहल छलाह। शिक्षा विभागक कहब अछि जे कक्षा ९म, १०म आ कक्षा ११म लेल ५६८९१ उच्चतर माध्यमिक विद्यालयमे कुल ९४७३८ शिक्षक नियुक्त कयल गेल अछि। तेँ आब अतिथि शिक्षकक जरूरत नहिं अछि।
बिहार शिक्षा विभाग सरकारी स्कूलमे शिक्षकक कमीकेँ दूर करबाक लेल अतिथि शिक्षकक नियुक्ति करबाक निर्णय लेने छल। मुदा आब सरकार हुनका सभके नियुक्त करबासँ मना कऽ देलक अछि। अतिथि शिक्षक कहैत छथि जे हुनकर माँग स्वीकार कयल जेबाक चाही। अन्यथा, ओ बेरोजगार भऽ जयथिन।
