राष्ट्रीय जांच एजेंसी (एनआईए) बेंगलुरुमे रामेश्वरम कैफे विस्फोट मामिलामे दूटा आरोपीकेँ गिरफ्तार कयलक अछि। गिरफ्तार कयल गेल दुनू आरोपी बैंगलोर विस्फोटक मास्टरमाइंड कहल जा रहल अछि। ई गिरफ्तारी कोलकातासँ कयल गेल अछि, जाहिसँ पश्चिम बङ्गालमे भाजपा आ टीएमसी आमने-सामने आबि गेल अछि। भाजपा आरोप लगओलक अछि जे बंगाल आतंकवादीक लेल सुरक्षित पनाहगाह बनि गेल अछि। संगहि टीएमसी सेहो भाजपा पर पलटवार कयलक अछि।
भाजपा नेता आ पश्चिम बंगाल भाजपाक सह-प्रभारी अमित मालवीय बेंगलुरु विस्फोटक आरोपीक गिरफ्तारीपर सोशल मीडिया पर एकटा पोस्ट कयलनि। एहि पोस्टमे भाजपा नेता लिखलनि जे ‘एनआईए कोलकातासँ रामेश्वरम कैफेसँ दूटा मुख्य संदिग्धकेँ गिरफ्तार कयलक अछि। एहिमे मुसाविर हुसैन शाजिब आ अब्दुल मतीन अहमद ताहा सम्मिलित अछि। दुनू आईएसआईएसक शिवमोगा वा पश्चिम बङ्गालक सेलसँ जुड़ल भऽ सकैत अछि। दुर्भाग्यवश, ममता बनर्जीक नेतृत्वमे बंगाल आतंकवादीक लेल सुरक्षित पनाहगाह बनि गेल अछि।’
भाजपा नेताक ट्वीटक तुरन्त बाद टीएमसी नेता कुणाल घोष दावा कयलनि जे आरोपी सभकेँ बंगाल पुलिसक मदतिसँ गिरफ्तार कयल गेल अछि। टीएमसी नेता एकटा सोशल मीडिया पोस्टमे लिखलनि जे बंगाल पुलिस बेंगलुरु विस्फोट मामिलामे नीक काज कयलक अछि। एनआईए सेहो बंगाल पुलिसक मदद स्वीकार कऽ लेलक अछि। कोनो राष्ट्रविरोधी ताकतक संग सख्तीसँ निपटल जायत, मुदा हम भाजपासँ पूछय चाहैत छी जे ई गिरफ्तारी कतयसँ भेल ? कांधीसँ। हम सभ जनैत छी जे ओतय कोन भाजपा नेता आ हुनक परिवारक वर्चस्व अछि आ कोंटाईसँ अवैध गतिविधि कयल जाइत अछि। कांथी वा कोंटाई भाजपा नेता शुभेंदु अधिकारीक निर्वाचन क्षेत्र मानल जाइत अछि। टीएमसी नेता एहि घटनाक जाँचक माँग कयलनि।
बंगाल पुलिस सेहो भाजपाक आरोपपर नाराजगी व्यक्त कयलक आ कहलक जे दुनू आरोपी बंगाल पुलिस आ एनआईएक संयुक्त अभियानमे पकड़ल गेल अछि। पुलिस कहलक जे राज्य कहियो आतंकवादीक लेल सुरक्षित पनाहगाह नहिं बनत आ लोककेँ सुरक्षित रखबाक लेल काज करैत रहत। एनआईए दुनू आरोपीकेँ कोलकाताक बाहरी इलाकासँ गिरफ्तार कयलक अछि।
