माता राबड़ी देवी आ पिता लालू प्रसाद यादव संग कयलनि मंदिरमे दर्शन-पूजन
*
पटना
*
बिहारक पूर्व मुख्यमंत्री आ राजद प्रमुख लालू प्रसाद यादवक बेटी रोहिणी आचार्य लोकसभा चुनाव लड़ि रहल छथि। एम्हर रोहिणी आचार्य अपन माता-पिताक संग सोनपुरक हरिहरनाथ मन्दिर पहुँचि पूजा कयलनि।
लोकसभा चुनाव बहुत दूर नहिं अछि। सभ दल चुनावक तैयारीमे लागल अछि आ अपन उम्मीदवारक घोषणा कऽ रहल अछि। एम्हर बिहारसँ पैघ खबरि सामने आयल अछि। लालू प्रसाद यादवक बेटी रोहिणी आचार्य सेहो एहि सालक लोकसभा चुनाव लड़ि रहल छथि। राजद सारण लोकसभा सीटसँ रोहिणी आचार्यकेँ मैदानमे उतारने अछि। भाजपा एहि सीटसँ राजीव प्रताप रूड़ीकेँ टिकट देलक अछि। एकर मतलब अछि जे बिहारक सारण सीट पर भाजपा आ राजदक बीच कड़ा मुकाबला भऽ सकैत अछि। रोहिणी आचार्य अपन माता राबड़ी देवी आ पिता लालू यादवक सङ्ग सोनपुरक हरिहर मन्दिरमे पूजा-अर्चना कयलनि। बिहारक पूर्व मुख्यमंत्री राबड़ी देवी अपन बेटीक संग मन्दिर गेल छलीह।
बिहारक पूर्व मुख्यमंत्री राबड़ी देवी कहलनि, ‘हम सभ मंदिर आयल छलौंह। बाबा भोलेनाथ हमरासभ पर ध्यान दैत छथि। हम सभ सदैव बाबाक पूजा करबाक लेल अबैत छी। तखन ओ भाजपा आ प्रधानमंत्री नरेन्द्र मोदी पर निशाना साधलनि। ओ कहलनि, “हम डरैत नहिं छी। बिहारक जनता जागि गेल अछि। जनता मोदीजीक झूठ वादा केर बुझि चुकल अछि। देशक जनता सब किछु बुझि गेल अछि।”
ओ आगू कहलनि कि, हुनका (राजग) बिहारमे 4 सीट तक नहिं भेटत। मोदीकेँ भगाबए केर अछि। ओ झूठ वादा करैत छथि जे गरीबकेँ रोजगार भेटत। १० सालमे मोदीजीक वादा कतए चलि गेल ? राबड़ी देवी इहो दावा कयलनि जे गठबंधनक प्रत्येक उम्मीदवार जीतत। हम सभ बड़का पूजा कयलौंह अछि आ बाबा हमरा सबकेँ पूरा आशीर्वाद देलखिन।
सारण लोकसभा सीटसँ बेटीकेँ चुनाव लड़बा पर राबड़ी यादव कहलनि, कोनो परिवारवाद नहिं अछि। हमर बेटी दोसर घरसँ अछि। सबहक बेटा-बेटी चुनाव लड़ि रहल छथि। की भाजपामे चुनाव नहिं लड़ि रहल अछि ? भाजपा आ जदयूमे चाचा, चाची, काका, काकी, नाना, नानी सब चुनाव लड़ि रहल छथि, ई मात्र राजदमे नहिं अछि।
