दोहरी नागरिकता मामिलामे एफआईआर कय ब्रिटिश नागरिकताक जांच करय सीबीआई : हाईकोर्ट

प्रयागराज। समदिया

इलाहाबाद हाईकोर्टक लखनऊ बेंच कांग्रेस नेता राहुल गांधीक खिलाफ एफआईआर करबाक आदेश देलका अछि। एकर बाद आब राहुल गांधीक मुश्किल बढ़ि गेल अछि। दोहरी नागरिकताक मामिलामे शुक्रदिन लखनऊ बेंचमे सुनवाई भेल। ई  मामिला निचली अदालतक ओहि फैसलाक खिलाफ अछि, जतय राहुल गांधीक खिलाफ एफआईआर दर्ज करबाक मांगकेँ खारिज कय देलक।

यूपी सरकारक दिससँ वकील कहलनि कि एही पूरा प्रकरणक जांच सीबीआई करय। एही पर जज मंजूरी देलनि। कहलनि कि एफआईआर दर्ज कय मामिलाकेँ सीबीआईकेँ ट्रांसफर कयल जाय। आब एफआईआर दर्ज भेलाक बाद प्रकरणक जांच सीबीआई करत।

जनतब देब जे कर्नाटकक भाजपा कार्यकर्ता एस विग्नेश शिशिर ई याचिका दाखिल कयने छलथि। याची लखनऊक विशेष एमपी/एमएलए अदालतक 28 जनवरी 2026 केर ओहि आदेशकेँ चुनौती देने छल, जाहिमे अदालत राहुल गांधीक खिलाफ एफआईआर दर्ज करबाक निर्देश देबाक हुनक अर्जी खारिज कय देने छल। याची राहुल गांधीक खिलाफ एफआईआर दर्ज करय आ मामिला विस्तृत जांच करय केर मांग कयने छलथि। याची राहुल गांधीक खिलाफ भारतीय नागरिक संहिता, पासपोर्ट अधिनियम, आफिसियल सीक्रेट एक्टक तहत विभिन्न धारामे गंभीर आरोप लगौने अछि।