बिहारक सरकारी विद्यालयसभ लेल नव समय-सारिणी जारी

पटना । समदिया

बिहार सरकारक शिक्षा विभाग राज्यक सभ सरकारी विद्यालयक लेल नव समय-सारिणी जारी कएलक अछि। नव व्यवस्थाक अनुसार आब सोमसँ शुक्र धरि विद्यालय सभ भोरे 9:30 बजेसँ साँझ 4:00 बजे धरि संचालित होएत। शनिकेँ हाफ डे रहत आ विद्यालय भोरे 9:30 बजेसँ दुपहर 1:00 बजे धरि खुलत। ई व्यवस्था 6 अगस्त 2026 सँ तत्काल प्रभावसँ लागू भऽ गेल अछि।

शिक्षा विभागक अनुसार, मुख्यमंत्री सम्राट चौधरीक निर्देश पर ई संशोधित समय-सारिणी लागू कएल गेल अछि। एकर उद्देश्य विद्यार्थीसभक पढ़ाइ, मध्याह्न भोजन (एमडीएम) आ विद्यालयक प्रशासनिक काजकेँ बेसी सुव्यवस्थित बनायब अछि।

नव निर्देश अनुसार शनिकेँ कक्षा 1 सँ 8 धरिक विद्यार्थीसभक पढ़ाइ दुपहर 12:00 बजे धरि चलत। एकर बाद छात्रसभकेँ मध्याह्न भोजन देल जाएत आ भोजनक उपरान्त छुट्टी भऽ जाएत। मुदा विद्यालय दुपहर 1:00 बजे धरि खुलल रहत, जाहिमे आवश्यक प्रशासनिक आ शैक्षणिक काज पूरा कएल जाएत।

शिक्षा विभाग सभ जिला शिक्षा पदाधिकारी, प्रखंड शिक्षा पदाधिकारी आ विद्यालय प्रधानसभकेँ नव समय-सारिणीक कड़ाईसँ अनुपालन सुनिश्चित करबाक निर्देश देलक अछि। सरकारक मानब अछि जे एहि परिवर्तनसँ पढ़ाइ, अनुशासन, शिक्षण गतिविधि आ मध्याह्न भोजन व्यवस्थामे सुधार होएत।

मुख्य बातसभ

– 6 अगस्त 2026 सँ नव समय-सारिणी लागू।

– सोमसँ शुक्र : भोरे 9:30 बजेसँ साँझ 4:00 बजे धरि विद्यालय।

– शनि : हाफ डे, भोरे 9:30 बजेसँ दुपहर 1:00 बजे धरि विद्यालय।

– कक्षा 1 सँ 8 धरिक पढ़ाइ दुपहरिया 12:00 बजे धरि।

– मध्याह्न भोजनक बाद छात्रसभकेँ छुट्टी।

– मुख्यमंत्री सम्राट चौधरीक निर्देश पर शिक्षा विभाग जारी कएलक नव अधिसूचना।