भारतीय नौसेना एकटा विशेष अभियानक दौरान एकटा पालवाला नावसँ मादक पदार्थक एखन धरिक सबसँ पैघ खेप जब्त कयलक अछि। अधिकारीसभ कहलनि जे बुधदिन भारतीय नौसेना नारकोटिक्स कंट्रोल ब्यूरो (एनसीबी)क समन्वयसँ अरबों रुपयाक एकटा संदिग्ध पालवाला नाव (डाऊ) केँ, जे समुद्रमे लगभग ३,३०० किलोग्राम प्रतिबंधित पदार्थ लऽ जा रहल छल – ३,०८९ किलोग्राम चरस, १५८ किलोग्राम मेथमफेटामाइन आ २५ किलोग्राम मॉर्फिन – जे हालक समयमे जब्त मात्राक मामिलामे एखन धरिक सबसँ पैघ अछि, पकड़लक अछि।
निगरानी मिशनमे पी८आई विमानसँ प्राप्त जानकारीक आधारपर, मिशनमे तैनात जहाजकेँ संदिग्ध डाउ तस्करीकेँ रोकबाक लेल डायवर्ट कऽ देल गेल छल। रोकल गेल नाव आ चालक दलक सङ्ग प्रतिबंधित पदार्थकेँ भारतीय बन्दरगाह पर कानून प्रवर्तन एजेंसीकेँ सौंपि देल गेल।
अधिकारी कहलखिन, “कानून प्रवर्तन एजेंसीसभक सङ्ग भारतीय नौसेनाक समन्वित प्रतिक्रिया देशक समुद्री पड़ोसमे मादक पदार्थक तस्करीक विरुद्ध हमर दृढ़ रूखकेँ दर्शाबैत अछि।” भारतीय नौसेना अदनक खाड़ी आ अरब सागरमे चलि रहल समुद्री सुरक्षा स्थितिक प्रतिक्रियामे विशेष बल सेहो तैनात कयलक अछि। नौसेना एहि क्षेत्रमे समुद्री डकैती-रोधी अभियान जारी रखबाक लेल अरब सागरमे सी-१३० विमानकेँ पैराड्रॉप कऽ विशेष बल तैनात कयलक।
