बिहारमे मानसून देखाओत दम, 20 सँ 22 जुलाई धरि बारिश, आंधी-तूफान आ वज्रपातक अलर्ट
पटना। समदिया
बिहारक मौसममे एक बेर फेर तेजीसँ बदलाव आबय वला अछि। मौसम विभाग 20 जुलाईसँ 22 जुलाई धरि कतेको क्षेत्रमे आंधी, हवा आ भारी बारिशक चेतावनी जारी कयलक।
किछु जिलाक निवासीकेँ एहि दौरान अतिरिक्त सावधानी बरतय केर सलाह देल गेल अछि, जखन कि दोसर इलाकामे मौसमक स्थिति अपेक्षाकृत सामान्य रहत। जँ एहि तीन दिनमे कियो यात्रा करय केर योजना बना रहल अछि तँ अपन विशिष्ट स्थानक लेल मौसमक पूर्वानुमान देखब नीक रहत।
पटना मौसम केंद्रक दिससँ 20 जुलाईकेँ पश्चिम चंपारण, पूर्वी चंपारण, गोपालगंज, सिवान, सारण, बक्सर, भोजपुर, रोहतास, कैमूर आओर औरंगाबाद जिलामे भारी बरखाक अनुमान अछि। एही क्षेत्र लेल ‘ऑरेंज अलर्ट’ जारी कयल गेल अछि, जतय तेज तूफानक संग मूसलाधार बारिशक संभावना अछि।
पटना, गया, नालंदा, नवादा, जहानाबाद, अरवल, बेगूसराय, लखीसराय, समस्तीपुर, वैशाली, मुजफ्फरपुर, दरभंगा, मधुबनी, सीतामढ़ी आ शिवहर लेल ‘येलो अलर्ट’ जारी कयल गेल अछि। एहि इलाकामे हल्कासँ मध्यम बरखा आ तेज हवा चलि सकैत अछि।
मुंगेर, जमुई, बांका, भागलपुर, खगड़िया, सहरसा, मधेपुरा, सुपौल, अररिया, पूर्णिया, कटिहार, आ किशनगंजमे मौसमक स्थिति अपेक्षाकृत शांत रहत।
21 जुलाईकेँ भारी बरखाक अलर्टसँ किछु राहत भेटत, मुदा राज्यक एकटा महत्वपूर्ण हिस्सा लेल ‘येलो अलर्ट’ लागू अछि। एही दिन पश्चिम चंपारण, पूर्वी चंपारण, गोपालगंज, सीवान, सारण, वैशाली, समस्तीपुर, बेगुसराय, लखीसराय, शेखपुरा, नालंदा, नवादा, गया, औरंगाबाद, रोहतास, कैमूर, बक्सर, भोजपुर, पटना, जहानाबाद आ अरवल जिलामे मेघ गर्जनक संग तेज हवा चलबाक आ बारिशक आसार अछि।
मुजफ्फरपुर, सीतामढ़ी, शिवहर, दरिभंगा आ मधुबनीक संग-संग सुपौल, अररिया, किशनगंज, पूर्णिया, कटिहार, मधेपुरा, सहरसा, खगड़िया, मुंगेर, भागलपुर, बांका आ जमुईक मौसम साफ रहत।
22 जुलाईकेँ सेहो बिहारक मिलल-जुलल रहबाक उम्मीद अछि। पश्चिम चंपारण, पूर्वी चंपारण, गोपालगंज, सिवान, सारण, बक्सर, भोजपुर, रोहतास, कैमूर, औरंगाबाद, गया, नवादा, नालंदा, शेखपुरा, लखीसराय, बेगूसराय, खगड़िया, मुंगेर, भागलपुर, बांका, जमुई, पटना, जहानाबाद आ अरवल जिलामे प्रतिकूल मौसमक स्थितिक अनुमान अछि। एहि इलाकामे लोककेँ सतर्क रहय केर सलाह देल गेल अछि।
वैशाली, समस्तीपुर, मुजफ्फरपुर, दरिभंगा, मधुबनी, सीतामढ़ी, शिवहर, सुपौल, सहरसा, मधेपुरा, अररिया, पूर्णिया, कटिहार आ किशनगंज जिलामे मौसम पूर्णतः सुहावना आ शांत रहत।
