अमेरिकाक एमक्यु-9 ड्रोनकेँ ईरान नष्ट कयलक, यूएस लगातार 8म राति तेहरान पर बरसौलाक बम
नई दिल्ली। समदिया
ईरानक इस्लामिक रिवोल्यूशनरी गार्ड कॉर्प्स दावा कयलक अछि कि ओ खुजेस्तान प्रांतक अहवाजमे अमेरिकी एमक्यु-9 रीपर ड्रोनकेँ इंटरसेप्ट कय खसा देलक। ईरानी सरकारी मीडिया ड्रोन खसाबय केर वीडियो सेहो जारी कयलक।
इस्लामिक रिवोल्यूशनरी गार्ड कॉर्प्सक मोताबिक, ओ अपन नव डिफेंस सिस्टमसँ ड्रोनकेँ निशाना बनौलक। हालांकि अमेरिका अखनि धरि नहि तँ ड्रोन खसेलबाक दावाक पुष्टि कएलक अछि आ नहि जारी वीडियो पर कोनो आधिकारिक प्रतिक्रिया देलक अछि।
एमक्यु-9 रीपर अमेरिकी सेनाक अत्याधुनिक मानव रहित ड्रोन अछि, जाकर इस्तेमाल निगरानी, खुफिया जानकारी जुटाबय आ सटीक हवाई हमला लेल कयल जायत अछि।
दोसर दिस, अमेरिकी सेना कहलक, ओ लगातार आठम राति ईरानक खिलाफ हवाई हमला कएलक। एहीसँ पहिने अमेरिका जानकारी देने छल कि जॉर्डनमे ईरानक मिसाइल हमलामे दू अमेरिकी सैनिकक मृत्यु भेल, जखनि कि एक सैनिक लापता अछि।
जनतब देब जे ईरान अमेरिकाक संग एक महीना पहिने भेल समझौतासँ पाछू हटय केर ऐलान कयलक अछि। ईरानक उप विदेश मंत्री कहलनि कि अमेरिका अपने समझौतेक उल्लंघन कयलक, ताहि लेल ओहो ओकर शर्तोंक पालन नहि करत।
ईरानक स्वास्थ्य मंत्रालय दावा कयलक अछि कि 27 जूनसँ 18 जुलाईक बीच अमेरिकी हवाई हमलामे 50 लोकक मृत्यु आ 500 घायल भेल अछि।
एही बीच कुवैत दावा कयलक कि ईरान ओकर एक डिसैलिनेशन प्लांट पर हमला कयलक अछि। ओतय, ईरान सेहो दावा कयलक कि अमेरिका ईरानक होर्मोजगानमे एक डिसैलिनेशन प्लांट पर हमला कयलक अछि।
अमेरिकी हमलामे बंदर अब्बास-रूदान मार्ग पर स्थित दूटा पुल नीक जँका क्षतिग्रस्त भ गेल अछि आ जस्क लग एक इलाका पर सेहो सैन्य हमला भेल।
जनतब दी जे होर्मुज स्ट्रेटसँ गुजरय वला जहाजक संख्या तीन हफ्ताक सबसँ निचला स्तर पर पहुंच गेल अछि। शिप ट्रैकिंग वेबसाइट मरीन ट्रैफिकक मोताबिक, बृहस्पतिकेँ स्ट्रेटसँ सिर्फ 8 जहाज गुजरल।
