कांग्रेसक पूर्व राष्ट्रीय अध्यक्ष आ वरिष्ठ नेता राहुल गाँधीक भारत जोड़ो न्याय यात्रा राघौगढ़सँ शाजापुर पहुँचल। एतय ओ रोड शो कयलनि आ प्रधानमंत्री नरेन्द्र मोदी पर भयंकर निशाना साधलनि। ओ कहलनि जे मोदी जी चाहैत छथि जे अहां मोबाइल देखू। जय श्री राम कहियौ आ भूखसँ मरि जाउ। ओ इहो आरोप लगओलनि जे प्रधानमंत्री नरेन्द्र मोदी जातिवाद आ धर्मवादकेँ बढ़ावा दैत आपसमे लड़ा रहल छथि।
राहुल गाँधीक भारत जोड़ो न्याय यात्रा भोर ११ बजे शाजापुर जिला मुख्यालय पहुँचल। राहुल गाँधीक रोड शोक दौरान लोकसभ ठाम-ठाम स्वागत कयलक। मुदा, कांग्रेसक वरिष्ठ नेता अपन कार्यकर्ता सभक अभिवादन स्वीकार नहिं कयलनि। एहि दौरान कतेको घंटा पहिने प्रशासन सुरक्षाकेँ देखैत शहरी राजमार्ग पर लोकक आवाजाही रोकि देने छल। एहिसँ राहगीरकेँ बहुत समस्या भेल। कतेको ठाम पुलिसक संग बहस सेहो भेल। कतेको स्थानीय कार्यकर्ता राहुल गाँधीक स्वागत करबाक प्रयास कयलनि मुदा हुनको सभकेँ रोकि देल गेल।
शाजापुर शहरमे राहुल गाँधीक भारत जोड़ो न्याय यात्राक शुरुआतेमे भाजपाक किछु कार्यकर्ता पार्टीक झण्डा लऽ कऽ पहुँचल छलाह। ओ मोदी-मोदी नाराक संग राहुल गाँधीक स्वागत कयलनि। ई सुनि राहुल गाँधी स्वयं कारसँ उतरि गेलाह। भाजपा कार्यकर्तासँ संपर्क कयलनि। एहि दौरान भाजपा कार्यकर्ता जय श्री रामक नारा सेहो लगओलनि। भाजपाक किछु कार्यकर्ता राहुल गांधीक हाथमे आलू सेहो देलखिन आ कहलनि आलूसँ सोना बना दिअ।
राहुल आरोप लगओलनि जे भाजपा भाषाकेँ भाषासँ आ धर्मकेँ धर्मसँ लड़बैत अछि। ई जातिकेँ जातिसँ लड़बैत अछि। हम एकरा खिलाफ भारत जोड़ो न्याय यात्रा निकालने छी। ओ आरोप लगओलनि जे युवासभकेँ बेरोजगार कऽ देल गेल अछि आ ओ दिन भरि रील देखैत रहैत छथि। सब रोजगार चीनक युवाकेँ जा रहल अछि। हम एहि युवा सभकेँ न्याय प्राप्त करेबाक लेल यात्रा निकालि रहल छी।
