कला साधना केर कोनो उम्र नहिं होइछ, मनमे लगन हो तऽ सफलताक बाट स्वत: सुभितगर होइत चलि जाइत अछि। मिथिलाक माटिमे अनेक एहन कलाकार भेलाह, जे अपन कला साधनाक बदौलति अपन मातृभूमि मिथिला आ मातृभाषा मैथिलीक नाम राष्ट्रीय फलक पर उजागर कयलनि। मिथिलाक धरा धाममे जन्म लेनिहारि एकटा एहने कवियित्री आ मैथिलीक पारंपरिक गीतक स्वनामधन्य लोक गायिका छथि सोनी चौधरी, जे अपन गायकीसँ श्रोताकेँ नहिं मात्र मंत्रमुग्ध कयलनि अछि, अपितु भारतवर्षक सभ कोनमे मैथिलीक आंचलिक परिवेश पर रचित पारंपरिक गीतक मनोहारी प्रस्तुति दऽ अपन गायिकी केर अमिट छाप छोड़ने छथि।
हिन्दी आ मैथिलीक प्रसिद्ध गायिका मिथिलाक सोनधिया सोनी चौधरीकेँ मिथिलाक पारंपरिक लोकगीतक सुंदर गायिकी लेल रविदिन राष्ट्रीय न्यूज नेटवर्क, चंडीगढ़ केर तत्वावधानमे होटल माउंटव्यूमे आयोजित भव्य सम्मान समारोहमे ‘कर्मवीर भूषण सम्मान’सँ सम्मानित कयल गेलनि। हुनका ई सम्मान भारतीय जनता पार्टीक पूर्व राष्ट्रीय सांगठनिक महासचिव संजय विनायक जोशी, हरियाणाक सीएम केर लोक सलाहकार तरुण भादुड़ी आ राष्ट्रीय न्यूज नेटवर्क केर सीईओ सोमनाथ ठाकुर केर हाथें प्रदान कयल गेलनि। हरियाणाक राजधानीमे हुनका ई सम्मान भेटलासँ मिथिला क्षेत्रमे कला ओ संगीत स्नेहीक मध्य हर्ष आ उत्कर्षक माहौल अछि।
मैथिलीक पारंपरिक गीतक मनोहर गायिकी लेल ओ एहिसँ पूर्व विद्यापति सेवा संस्थान द्वारा मिथिला विभूति, अंतरराष्ट्रीय मैथिली सम्मेलन द्वारा मिथिला रत्न, मिथिलांचल सर्वांगीण विकास संस्थान, बेनीपट्टी द्वारा मिथिला गौरव, आंकलन एवं कार्य निष्पादन मूल्यांकन परिषद, नयी दिल्ली द्वारा ‘संगीत रत्न सम्मान 2022’ दतिया गुरुकुल (मध्य प्रदेश) द्वारा ‘सुर मधुकर सम्मान’, तिलकामांझी विश्वविद्यालय, भागलपुर द्वारा ‘तिलकामांझी राष्ट्रीय सम्मान’, मिथिला शिक्षा मंच, समस्तीपुर द्वारा ‘स्वामी विवेकानंद युवा सम्मान’, बिहार शिक्षा एवं सांस्कृतिक विकास परिषद, पटना द्वारा ‘बिहार सम्मान’, महिनाथपुरक संस्था द्वारा ‘संत शिरोमणि लक्ष्मीनाथ गोसाई सम्मान’ , बिहार रत्न सम्मान आदि अनेक प्रतिष्ठित सम्मानसँ सम्मानित भऽ चुकल छथि। एहिसँ पूर्व हुनका राष्ट्रीय युवा कल्याण परिषद, पटना द्वारा बिहार रत्न आ बिहार शिक्षा एवं सांस्कृतिक परिषद, पटना द्वारा बिहार सम्मानसँ सम्मानित कयल गेल छलनि।
जनतब जे गायिका सोनी चौधरी दरभंगा शहरक शुभंकरपुर मोहल्ला निवासी, ललित नारायण मिथिला विश्वविद्यालय केर सेवानिवृत्त पीजी हिन्दी विभागाध्यक्ष डा रमाकांत झाक बेटी आ नेहरा गामवासी गौड़ीशंकर चौधरीक पुतोहु छथि। सम्मान भेटला बाद सोनी चौधरी बतौलनि जे मैथिलीक पारंपरिक लोक गीतक गायिकी लेल एहि सम्मानसँ सम्मानित भऽ ओ अत्यंत गौरवान्वित अनुभव कऽ रहल छथि। अपन सफलताक श्रेय ओ अपन पति ललन चौधरी आ दूनू बच्चा रचना आ कृष्णाकेँ दैत कहलनि जे ई सम्मान हुनक संस्कारमे रचल-बसल मातृभाषा मैथिली आ पारंपरिक लोक गीतक संरक्षण आ संवर्धन केर प्रति उत्साह बढ़ेबाक काज करत।
