नीतीश कुमारक मंत्री आक्रोशित होइत अधिकारीसँ कहलनि – बेसी अंग्रेजी नहिं सिखाउ, की हम मूर्ख छी

सहरसा समदिया
*

राजस्व आ भूमि सुधार सह प्रभारी मंत्री डॉ. दिलीप कुमार जायसवालक अध्यक्षतामे बृहस्पति दिन विकास भवन सभागारमे जनकल्याणकारी योजना सभक समीक्षा बैसार भेल। एहि अवसर पर पंजीयन आ निषेध मंत्री रत्नेश सदा सेहो उपस्थित छलाह। समीक्षाक दौरान मंत्री शिक्षा, स्वास्थ्य आ पीएचईडीक काजपर नाराजगी व्यक्त कयलनि। जखन जिला शिक्षा पदाधिकारी (डीईओ) ठीकसँ रिपोर्ट नहिं देलनि तखन मंत्री रत्नेश सदा हस्तक्षेप करैत कहलनि, “डीईओ साहब, की हम मूर्ख लोक छी ? अंग्रेजी पाठ नहिं पढ़ाउ, बस हिन्दीमे गतिविधिक विषयमे सही जानकारी दियौक।” प्रभारी मंत्री डीईओ अनिल कुमारक रिपोर्टिंग पर सेहो नाराजगी व्यक्त कयलनि आ बैसारक बीचमे हुनका पर कारवाई क निर्देश देल गेल। ओ कहलनि, “जाउ कार्यकारी अभियंताकेँ ताकू आ ओकरा लऽ आउ।” शिक्षा विभागसँ जुड़ल काजक समीक्षा करबाक लेल मंत्री शेष पाठ्यपुस्तक वितरण कार्य बिना कोनो देरीक, जिलामे संचालित 12 कस्तूरबा गांधी बालिका विद्यालयक सुचारू संचालन, छात्र कल्याण योजनाक क्रियान्वयनक निर्देश देलनि। जिला शिक्षा पदाधिकारीकेँ विद्यालयक नियमित निरीक्षणक क्रममे उपलब्ध बुनियादी संसाधन आ नवनिर्मित बुनियादी ढाँचाक भौतिक सत्यापन करबाक निर्देश सेहो देल गेल अछि। वन प्रभाग द्वारा एखन धरि कयल गेल काजक समीक्षाक क्रममे रोपल पौधाक विरुद्ध ओकर जीवित रहबाक सत्यापन करबाक निर्देश देल गेल छल। श्रम संसाधन कार्यालयकेँ स्पष्ट कार्ययोजनाक आधार पर उपलब्ध श्रम प्रवर्तन अधिकारीसभसँ काज लेबाक निर्देश देल गेल अछि। लोक स्वास्थ्य अभियांत्रिकी विभाग जनतब देलक जे १५१ पंचायतक १७२६ वार्डमे नलजल योजना पूरा कयल गेल अछि। मंत्री पीएचईडीक कार्यकारी अभियंताकेँ नियमित अन्तरालपर पानिक गुणवत्ताक जाँच करयबाक निर्देश देलनि।