मैथिली सिनेमा ‘मिलन’ होयत आगामी २२ मार्च, शुक्रकेँ रिलीज

कार्यालय समदिया
*

बहुप्रतीक्षित मैथिली सिनेमा “मिलन” आगामी 22 मार्च (शुक्रदिन) सँ दरभंगा, समस्तीपुर, लखीसराय, बेगूसराय, कटिहार आ बासोपट्टी संगहि क्षेत्रक विभिन्न सिनेमाघरमे प्रदर्शन लेल तैयार अछि। चर्चित सिनेमा “मिलन” केर पहिल शो 22 मार्च (शुक्रदिन) दरभंगाक साहिल सिनेमामे 12 बजेसँ प्रदर्शित होयत। एहि फिल्मक प्रचार – प्रसारक लेल शहरक अनेको स्थान पर होर्डिंग पोस्टर आदि लगाओल गेल अछि। दर्शक लेल अग्रिम बुकिंग सेहो शुरू अछि। संतोषकुमार झा आ रामसुंदर झा कृत ई सिनेमा, पहिनहि अप्पन मधुर गीत संगीत लेल प्रसिद्धि पाबि चुकल अछि। एहि सिनेमाक निर्माता श्यामसुंदर झा, आ रामसुंदर झा छथि त’ शशि पाठकक निर्देशनमे ई सिनेमा बनाओल गेल अछि। अमन श्लोकक संगीत आ अप्पन अभिनयसँ स्वयंकेँ सिद्ध कएनिहार, संजीव पूनम मिश्र एहि फिल्ममे मुख्य भूमिकामे छथि। निर्माता – निर्देशक अप्पन कार्य कएलनि अछि, आब सभटा दर्शक पर अछि, ओना एहि फिल्मक सफलताक लेल अनेको मैथिल बुद्धिजीवी आ सिनेमा जगतसँ जुड़ल लोक आश्वस्त छथि, किएक त’ एकर प्रचार-प्रसार लेल अत्यधिक प्रयास कएल गेल छैक।