सफलतम दोसर सप्ताह – मैथिली फिल्म “मिलन”

मुंबई समदिया
*

ई वर्ष मैथिली सिनेमा लेल अत्यंत सुखद सिद्ध भ’ रहल अछि, कएक गोट मैथिली सिनेमा रिलीज भेल आ अनेको मैथिली सिनेमाक कार्य प्रगति पर अछि। विगत 22 मार्चकेँ रिलीज भेल मैथिली सिनेमा मिलन, एखनहु अप्पन दोसर सप्ताहमे दर्शककेँ सिनेमाघर धरि आनयमे सफल सिद्ध भ’ रहल अछि। मैथिली सिनेमा “मिलन” एक्कहि संग दर्जनों सिनेमाघरमे रिलीज कएल गेल जे, मैथिली सिनेमा जगत लेल शुभ संकेत अछि। दरभंगा, समस्तीपुर, लखीसराय, बेगूसराय, कटिहार आ बासोपट्टी संगहि क्षेत्रक विभिन्न सिनेमाघरमे ई फिल्म दर्शक लेल उपलब्ध कराओल गेल। शशि पाठक द्वारा निर्देशित ई फिल्म मिथिलाक मान्यता, आ संस्कृतिकेँ ध्यानमे राखि बनाओल गेल अछि। मिलन सिनेमाक माध्यमे समाजमे व्याप्त अनेको कुरीति पर प्रहार सेहो कएल गेल अछि। निर्माता रामसुंदर झा एवं संतोष झा कृत एहि मैथिली फिल्म “मिलन”मे मुख्य अभिनेता छथि संजीव पूनम मिश्रा, जे अप्पन अभिनयसँ दर्शकक प्रशंसाक पात्र बनल छथि। दरभंगा निवासी संजीव अप्पन फ़िल्मी कॅरियरमे अनेको फिल्ममे अभिनय कएने छथि। नो मोर #, मी टू, दिल साला सनकी, चिलम चौकी एवं मैथिली सिनेमामे अप्पन उत्तम अभिनयसँ स्वयंके सिद्ध कएने छथि। एहि फिल्मकेँ, दर्शक संगहि अनेको मैथिल बुद्धिजीवी, साहित्यकार, आ सिनेमा जगतसँ जुड़ल लोक द्वारा प्रशंसा भेटि रहल छैक। अनुमान लगाओल जा रहल अछि कि, ई मैथिली फिल्म मिलन, मैथिली सिनेमाक इतिहासमे अप्पन महत्वपूर्ण स्थान अवश्य सुरक्षित करत आ सफलताक एकटा नव आयाम स्थापित करत।