अयोध्यामे राम मंदिर बनलाक बाद सरकार बिहारक मिथिला क्षेत्रक सीतामढ़ी जिलामे सीता माताक लेल भव्य मन्दिर बनयबाक तैयारी कऽ रहल अछि। बिहार सरकार सीतामढ़ीमे विद्यमान मन्दिरक लगपासक ५० एकड़ जमीन अधिग्रहित करबाक निर्णय लेलक अछि जाहिसँ नव मन्दिर बनाओल जा सकय। ई निर्णय शुक्रदिन बिहार मंत्रिमंडलक बैसारमे लेल गेल अछि। सीतामढ़ी जिलाक पुनौरा धाम माता सीताक जन्मस्थान अछि।
पूर्व विधान परिषद सदस्य आ भाजपा नेता कामेश्वर चौपाल कहलखिन, “सीताक लेल सीतामढ़ी ओ अछि जे अयोध्या रामक लेल अछि। ई हिन्दूसभक लेल एकटा पवित्र स्थान अछि। दुनिया भरिक लोक आब अयोध्याक राम मन्दिरमे पूजा करबाक लेल अयताह आ सीताक जन्मस्थान सेहो देखय चाहताह। हमर तर्क अछि जे सीताक कदक अनुरूप सीतामढ़ी जिलामे एकटा भव्य मन्दिर बनबाक चाही।”
जनतब जे चौपाल १९८९ मे अयोध्यामे राम मन्दिरक शिलान्यासमे पहिल ईंट रखने छलथि। एकर अतिरिक्त चौपाल अयोध्या मंदिर ट्रस्टक न्यासी सेहो छथि।
चौपाल आगू कहलनि “सीतामढ़ीमे एकटा मन्दिर अछि जे १०० साल पहिने बनल छल, मुदा ई नीक स्थितिमे नहिं अछि। हमर प्रस्ताव एकटा नव मंदिर बनेबाक अछि, जे अयोध्यामे राम मन्दिर जकाँ भव्य होय।” ५० एकड़क अधिग्रहण ओहि १६.६३ एकड़क अतिरिक्त होयत जे बिहार सरकार वर्तमान मन्दिर परिसरक आसपास पुनर्विकासक लेल पहिनेसँ अधिग्रहित कऽ चुकल अछि। मन्दिरक निर्माण राम मन्दिरक तर्ज पर एकटा सार्वजनिक न्यासक माध्यमसँ जुटायल धनसँ कयल जायत।
एहि बारेमे बात करैत बिहारक मुख्यमंत्री नीतीश कुमारक प्रधान सचिव डॉ. एस सिद्धार्थ कहलखिन, “सरकार मंदिर नहिं बना सकैत अछि, मुदा राज्यमे मांग उठल अछि जे एतय भव्य मंदिर बनेबाक चाही। सरकार एकरा संभव बनेबाक लेल जमीन अधिग्रहण कए रहल अछि।
सीतामढ़ी रामायणमे उल्लिखित १५ महत्वपूर्ण स्थानक समूह रामायण सर्किटक हिस्सा अछि, जकरा केन्द्र सरकार धार्मिक पर्यटनकेँ बढ़ावा देबाक लेल चिन्हित कयलक अछि। नव मन्दिरक माँग बहुत दिनसँ चलि रहल अछि, मुदा किछु साल पहिने अयोध्यामे मन्दिरक निर्माण शुरू भेलाक बादसँ एकरा गति भेटल अछि। बिहार सरकार एहि क्षेत्रमे पुनर्विकास परियोजनाकेँ मंजूरी देलक आ एहि सालक आरम्भमे एकरा लेल ७२ करोड़ टाका स्वीकृत कयलक।
