बिहारमे नीतीश कुमारकेँ फेरसँ मुख्यमंत्री, आ सम्राट चौधरी एवं विजय सिन्हाकेँ उप मुख्यमंत्री बनेबाक लेल अखिल भारतीय मिथिला संघ (पंजी) एनडीए व प्रधानमंत्री नरेंद्र मोदीकेँ बधाई आ शुभकामना प्रेषित करैत अछि। आशा अछि जे बिहारमे बनल एनडीए सरकार राज्यक विकासक संग मिथिलाक जनताक आकांक्षा पूरा करबाक लेल कोनो कसरि नहिं छोड़त। संघ केर विश्वास अछि जे नव टीम मिथिला क्षेत्र केर पूरा समर्पणक संग विकसित करत, जे दशकसँ उपेक्षित अछि। संघ, प्रधानमंत्री नरेन्द्र मोदीक ध्यान एहि बात दिस आकृष्ट करय चाहैत अछि जे मिथिलामे इंजीनियरिंग कॉलेज, मेडिकल कॉलेज आ कारखानाक अभाव अछि। बन्द चीनी मिल, जूट मिल, पेपर मिल, आ अन्य कारखाना बरखसँ निष्क्रिय अछि, ओकरा पुनर्जीवित करबाक कोनो प्रयास नहिं कयल गेल अछि, जाहिसँ ई संकेत भेटैत अछि जे एहि क्षेत्रक लोककेँ अपन भाग्यक भरोसे छोड़ि देल गेल अछि। एहि क्षेत्रक अधिकांश मेधावी छात्र आन राज्यमे जा कऽ पढ़ैत छथि, जँ एतय ई सुविधा बहाल कयल जायत तँ हुनका कठिनाई आ अपमानक सामना नहिं करय पड़त। प्रधानमंत्री नरेन्द्र मोदीक नेतृत्वमे पूरा देशमे विकासक लहरि चलि रहल अछि। आशा आ उम्मीद अछि जे नव सरकारमे मिथिलाक संग उपेक्षाक व्यवहार नहिं होयत आ बिहारक नव एनडीए सरकार एहि दिशामे एहन कतेको निर्णय लेत जे मीलक पत्थर साबित होयत।
