मधेश प्रज्ञा-प्रतिष्ठान आ नेपाल ललितकला प्रज्ञा-प्रतिष्ठानक संयुक्त आयोजनमे जनकपुरधामक महेन्द्रनारायण निधि संस्कृति केन्द्रमे २०२४ मार्च १५ सँ १८ धरि चलल मधेश प्रदेश स्तरीय ललितकला प्रदर्शनीक अवसर पर बिशेष रुपेँ बिशेषज्ञक रुपमे बजाओल गेल मिथिला लोक चित्रक मर्मज्ञ, वरिष्ठ कलाकार कल्पना सिंह प्रदर्शनीमे लागल लगभग डेढ सयसँ उपर कलाकृतिक अवलोकन करैत मुग्ध भऽ बजलीह – मधेशक आठो जिल्ला मिथिला लोक चित्र एवं
अन्य हस्तकलासँ एतेक समृद्ध अछि, हमरा नहि बुझल छल।
मधुबनी ड्योढीसँ आएल श्रीमती मिश्र मधेश प्रज्ञा-प्रतिष्ठान प्रति आभार व्यक्त करैत एहि तरहक आयोजनसँ नव-नव प्रतिभासभक उदय होयत से विश्वास व्यक्त कयलनि ।
एहि प्रदर्शनीक शुभारम्भ समारोहक उदघाटन नेपाल ललित कला प्रज्ञा प्रतिष्ठानक कुलपतिक संग मधेश प्रज्ञा-प्रतिष्ठानक अध्यक्ष राम भरोस कापडि भ्रमर कयलनि । प्रदर्शनीमे आएल कलाकृति महक उत्कृष्ट किछु कलाकृति राष्ट्रिय प्रदर्शनीमे प्रतियोगिताक हेतु काठमाण्डू पठाओल जाएत।
