समारोह पूर्वक मधवापुरक निवर्तमान थानाध्यक्षकेँ देल गेल विदाई, नव पदस्थापितकेँ कयल गेल अभिनंदन

दुनू थानाध्यक्षकेँ मिथिला परंपरा अनुसार अंग वस्त्रम, पाग डोपटासँ कयल गेल सम्मानित
*
समदिया मधुबनी
*

मधवापुर थानाध्यक्ष सह निरीक्षक राजकुमार मंडलकेँ स्थानांतरण दरभंगा जिला भेल।ओ बहेरा अंचलक पुलिस निरीक्षक बनाओल गेलाहा। ओतएसँ योगदान उपरांत ओ मधवापुर अयला। जखनि कि नव पदस्थापित थानाध्यक्षकेँ रूपमे बासोपट्टी थानाक अपर थानाध्यक्ष पंकज कुमार चौधरी एतए योगदान देलैन्ह अछि। एहि अवसर पर थाना प्रांगणमे एकटा विदाई सह सम्मान समारोहक आयोजन कयल गेल। पूर्व थानाध्यक्ष राज कुमार मंडलकेँ मिथिला परंपरा अनुसारेँ अंग वस्त्रम, पाग डोपटा, फूलक माला पहिराक भावभिनी विदाई देल गेलैन्ह। जखनि कि नव पदस्थापित थानाध्यक्ष पंकज कुमार चौधरीकेँ पाग डोपटा पहिरा अभिनंदन कयल गेलैन्ह। एहि क्रममे कार्यक्रमकेँ संबोधित करैत ऑल इंटरनेशनल रिपोर्टर्स एसोसिएशन आईराक जिला संरक्षक सह प्रदेश उपाध्यक्ष वरिष्ठ पत्रकार गांधी मिश्र गगन कहलैन्ह जे स्थानांतरण आर पदस्थापन सेवा कालक शाश्वत नियम अछि। जाहिसँ सभ सरकारी पदाधिकारी आ कर्मीकेँ गुजरय पड़ैत छनि। मुदा, जे अधिकारी नीक काज करैत छैथ ओ ओतए केर आम लोकक दिलमे सदिखन अपन जगह बनौने रहैत छैथ। कियाक तऽ लोक हुनकर कीर्तिकेँ याद करैत छथि। स्थानांतरित थानाध्यक्ष सह निरीक्षक मंडल अपन मृदुभाषी स्वभावक कारणें यशस्वी रहलाहा। हिनकर एतए केर कार्यकाल सराहनीय रहला। उम्मीद अछि जे नव पदस्थापित थानाध्यक्ष पंकज कुमार चौधरी सेहो एहिठामक जनताक दिल दिमाग पर राज करताह आर पुलिस जनताक बीच समन्वय स्थापित रखताह।
ओतहि पूर्व मुखिया लक्षमणदेव मंडल, भाजपा जिला महामंत्री शिव कुमार प्रसाद, राजेश साह, उप सरपंच अतिबुल रहमान, कार्यक्रमक अध्यक्षता करैत जदयू प्रखंड अध्यक्ष सुरेंद्र यादव सङ्ग सभ जनप्रतिनिधि, समाजसेवी आर वक्ता पूर्व थानाध्यक्षक प्रशासनिक व्यवस्था केर सुदृढ़ आ जनताक सङ्ग समन्वय बना रखबाक लेल हुनका धन्यवाद देलैन्ह आर स्वस्थ रहबाक कामना करैत लगातार पदोन्नति करबाक शुभकामना देलैन्ह। एहि क्रममे मधवापुरक नव पदस्थापित थानाध्यक्ष पंकज कुमार चौधरी पूर्व थानाध्यक्षकेँ अपन आदर्श बतबैत हुनका द्वारा स्थापित कयल गेल बाट पर चलि कय विधि-व्यवस्था केँ अपन कार्यकालमे बरकरार रखबाक बात कहलैन्ह।
सम्मानित भेलाक उपरांत मधवापुरमे बीतल सेवा कालकेँ यादगार बतबैत पूर्व थानाध्यक्ष मंडल भावुक भऽ गेलाह। नम आंखिसँ ओ एतएकेँ अधिनस्थ कर्मी, जनप्रतिनिधि, अधिकारी आ मीडियाकर्मी सबहक भेटल सहयोगकेँ आजीवन याद रखबाक आ आभारी रहबाक बात कहलैन्ह। ओतए उपस्थित लोकसँ कोनो तरहक भेल कठिनाई लेल क्षमा करबाक आग्रह कयलनि। कार्यक्रमक अध्यक्षता जदयू प्रखंड अध्यक्ष सुरेंद्र प्रसाद तऽ संचालन पत्रकार निखिल मिश्रा कयलनि। एहि अवसर पर कमलेश कुमार, दयावान कुमार, बेचन साह, ललन साह, हरि ओम कुमार, राकेश नायक, कुणाल कुमार, एसआई सियाराम शर्मा, आमोद कुमार सिंह, सङ्ग सभ पुलिसकर्मी आ स्थानीय मीडियाकर्मी उपस्थित छलाह।