निर्वाचन आयोग (ईसी) शनि कऽ लोकसभाक चुनाव कार्यक्रमक घोषणा कऽ देलक अछि। एकरा संग पूरा देशमे आदर्श आचार संहिता सेहो लागू भऽ गेल। निर्वाचन आयोग सात चरणमे चुनाव करबाक घोषणा कयलक। लोकसभा चुनावक अंतिम चरण १ जूनकेँ होयत। परिणाम ४ जूनकेँ आबि जाएत। आयोग किछु राज्यमे विधानसभा चुनावक कार्यक्रम आ उपचुनावक खाली सीटक चुनावक घोषणा सेहो कयलक अछि।
मुख्य निर्वाचन आयुक्त राजीव कुमार कहलनि जे पहिल चरणक मतदान १९ अप्रैलकेँ होयत। एहि दौरान २१ राज्य आ केंद्र शासित प्रदेशमे मतदान होयत। पहिल चरणमे १०२ लोकसभा सीटपर मतदान होयत। दोसर चरण मे २६ अप्रैलकेँ मतदान होएत। एहि चरणमे देशक १३ राज्य आ केन्द्र शासित प्रदेशमे मतदान होयत। एहि दौरान देशक ८९ लोकसभा सीटपर चुनाव होयत।
मुख्य निर्वाचन आयुक्त कहलनि जे तेसर चरणमे १२ राज्य आ केंद्र शासित प्रदेशक ९४ लोकसभा सीटपर मतदान होयत। एहि चरणक लेल मतदान ७ मईकेँ होएत। चारिम चरणक मतदान 13 मईकेँ होएत। एहि अवधिमे देशक १० राज्य आ केन्द्र शासित प्रदेशक ९६ लोकसभा सीटपर मतदान होयत।
ओ कहलनि जे पाँचम चरणक मतदान २० मईकेँ होयत। एहि अवधिमे ८ राज्य आ केन्द्र शासित प्रदेशक ४९ लोकसभा सीटपर मतदान होयत। छठम चरणक मतदान २५ मईकेँ होएत। एहि दिन देशक सात राज्य आ केंद्र शासित प्रदेशक ५७ लोकसभा सीटपर मतदान होयत। सातम आ अंतिम चरणक मतदान १ जूनकेँ होयत। अंतिम चरणक दौरान ८ राज्य आ केंद्र शासित प्रदेशमे मतदान होयत। एहि चरणमे ५७ लोकसभा सीटपर मतदान होयत।
मतदानक तारीखक चरणवार विवरण :
पहिल चरणक मतदान: १९ अप्रैल
दोसर चरणक मतदान: २६ अप्रैल
तेसर चरणक मतदान: ७ मई
चारिम चरणक मतदान: १३ मई
पांचम चरणक मतदान: २० मई
छठम चरणक मतदान: २५ मई
सातम चरणक मतदान: १ जून
राजीव कुमार कहलनि जे चुनाव आयोग सहित ककरो आलोचना करबाक पूर्ण स्वतंत्रता अछि, मुदा फेक न्यूज, अफवाह फैलाबय केर स्वतंत्रता नहिं अछि। प्रत्येक राज्यक अधिकारीसभकेँ आपत्तिजनक बयानसँ सम्बन्धित पोस्ट हटाबय लेल कहबाक अधिकार देल गेल अछि। जँ कियो झूठ नरैटिव पसारि रहल अछि तऽ हम ओकरा पुरजोर मुकाबला करब। चुनाव आयोगक वेबसाइट पर ‘झूठ बनाम हकीकत’ नामसँ एकटा श्रृंखला शुरू कयल जायत। मतदाता सभसँ इहो अनुरोध कयल जाइत अछि जे सोशल मीडिया पर जे किछु आबि रहल अछि ओकर आँखि मूंद कऽ अनुसरण नहिं करथि आ आगू नहिं बढ़ाबैथ। झूठक बाजारमे रौनक खूब होइत अछि।
मुख्य निर्वाचन आयुक्त कहलनि जे चुनावमे हिंसाक स्थान नहिं हेबाक चाही। एहि बेर एकटा नव प्रयोग कएल जा रहल अछि। जे किछु हमरा सख्तीसँ करए पड़त, हम करब। प्रत्येक जिलामे एकटा नियंत्रण कक्ष स्थापित कयल जा रहल अछि। टीवी, सोशल मीडिया, वेब कास्टिंग, १९५० हेल्पलाइन आ शिकायत पोर्टल होएत। एकर निगरानी लेल प्रत्येक जिलाक एहन नियंत्रण कक्षमे एकटा अधिकारी नियुक्त कयल जायत। जतय शिकायत भेटत, सख्त कार्
कारवाई कयल जायत। जिनका लग गैर जमानती वारंट अछि आ जे हिस्ट्रीशीटर अछि तकर खिलाफ देशभरिमे कारवाई कयल जा रहल अछि। जे सभ तीन सालसँ एकटा जिलामे तैनात छथि, हुनका बदलबाक लेल कहल गेल अछि। जतय कतौह वाॅलंटियर आ अनुबंध पर लोक काज कऽ रहल छथि, हुनका चुनाव ड्यूटीमे नहिं लगायल जायत। किछु राज्यमे धनक उपयोग बेसी अछि। हम एहूसँ निपटि रहल छी। पिछला ११ चुनावमे ३,४०० करोड़ रुपयाक नकदीक अवैध उपयोग केर रोकल गेल अछि। २०१७-१८क तुलनामे २०२२-२३ मे एहन धनक जब्तीमे ८३५% केर वृद्धि भेल अछि। शराब, नगद, कुकर, साड़ी बांटय जेहन तरीका बंद करबाक सख्त निर्देश देल गेल अछि। बैंक इहो देखत जे नकदीक माँगमे अचानक वृद्धि भेल अछि कि नहिं। हर बंदरगाह, हवाई अड्डा, रेलवे स्टेशन, सड़क मार्ग पर सख्त निगरानी रहत। जतय हेलीकॉप्टर वा चार्टर्ड उड़ान उतरत, ओतय सामानक जाँच होयत।
