दिल्लीक मुख्यमंत्री अरविन्द केजरीवालकेँ शराब नीति मामिलामे ईडीक हिरासतक अंतिम दिन राउज एवेन्यू अदालतमे आनल गेल। अदालत केजरीवालक हिरासत ०१ अप्रैल तक बढ़ा देलक अछि।
दिल्लीक मुख्यमंत्री अरविन्द केजरीवाल पहिने कहलनि, “इ आरोप लगाओल जा रहल अछि जे ई १०० करोड़क घोटाला छल। इडीक मकसद आम आदमी पार्टी केर थकुचब अछि।”
दिल्लीक मुख्यमंत्री अरविन्द केजरीवालकेँ प्रवर्तन निदेशालय (ईडी) २१ मार्चकेँ धन हस्तांतरणक लेल हवाला ऑपरेटरक उपयोगक खुलासाक बाद गिरफ्तार कयलक। वित्तीय जांच एजेंसीक सूत्रक अनुसार, ई पैसा चुनाव, बैसार आ होटल पर खर्च करबाक लेल हस्तांतरित कयल जा रहल छल।
ईडीक अनुसार, केजरीवाल अपन आम आदमी पार्टी (आप)क अन्य शीर्ष नेताक सङ्ग दिल्ली आबकारी नीतिक संबंधमे कथित रूपसँ १०० करोड़ टाकाक घूस लेलनि, आ ई पैसा कतेको बिचौलियाक माध्यमसँ हस्तांतरित कयल गेल। एहि प्रक्रियामे बी.आर.एस. एमएलसी के. कविता आ ‘साउथ ग्रुप’क सदस्य सभकेँ सम्मिलित कयल गेल।
केजरीवाल ईडी द्वारा नओटा सम्मनकेँ नजरअंदाज कऽ देने छलाह जाहिसँ हुनका विरुद्ध आपराधिक प्रक्रिया संहिता (सीआरपीसी)क अन्तर्गत अदालतमे दूटा मामिला दायर कयल गेल छल। ईडी सबूत जुटाबय केर बाद गिरफ्तारी कयलक। १६ मार्चकेँ ईडी कविताक हिरासतक माँग कयलक आ पछिला सप्ताह हुनका हैदराबादसँ गिरफ्तार कयलक। ओ बीआरएस सुप्रीमो आ तेलंगानाक पूर्व मुख्यमंत्रीक बेटी छथि। ईडी कथित घोटालामे “प्रमुख षड्यंत्रकारी आ लाभार्थी”क रूपमे हुनकर कथित संलिप्तताक खुलासा कयलक। जांच एजेंसी हिरासतमे लेबय लेल अपन याचिकामे आरोप लगओलक जे कविता ‘साउथ ग्रुप’ केर अन्य सदस्य – शरथ रेड्डी, राघव मगुंटा आ मगुंटा श्रीनिवासुलु रेड्डीक संग सीएम केजरीवाल आ हुनकर उप सहित आम आदमी पार्टीक शीर्ष नेता सभकक संग साजिश कयलक। तत्कालीन आबकारी मंत्री आ उपमुख्यमंत्री मनीष सिसोदिया हुनका १०० करोड़ टाकाक घूस देलनि।
अदालतक समक्ष ईडीक आवेदनमे कहल गेल अछि, “आम आदमी पार्टीक नेतासभकेँ देल गेल रिश्वतक बदलामे हुनका लग नीति निर्माणक पहुँच छल आ हुनका लेल अनुकूल स्थिति सुनिश्चित करबाक हेतु प्रावधानक पेशकश कयल गेल छल।”
ईडी इहो आरोप लगओलक जे कविताकेँ अपन डमी अरुण पिल्लईक माध्यमसँ इन्डो स्पिरिट्सक सङ्ग साझेदारीमे पेरनोड रिकार्ड इंडिया प्राइवेट लिमिटेडक एहि फर्म आ वितरण व्यवसायमे पर्याप्त निवेश कयने बिना हिस्सा भेटल, जे देशक सबसँ पैघ निर्मातासभमेसँ एक अछि आ एहि तरहेँ दिल्ली आबकारी नीति २०२१-२२ केर अवधिमे इंडो स्पिरिट्सकेँ सबसँ बेसी लाभदायक एल १ बना देलक आ लाभक आड़मे अपराधक आय कमेलक। पुनः नीति थोक विक्रेताक लाभ मार्जिन बढ़ाकऽ १२ प्रतिशत कऽ देलक जाहिसँ एहि मार्जिनक एकटा हिस्सा घूसक रूपमे वापस लेल जा सकय। ई अवैध धनक निरंतर प्रवाह उत्पन्न करबाक लेल कयल गेल छल। आवेदनमे दावा कयल गेल अछि जे आम आदमी पार्टी थोक विक्रेतासभसँ घूसक रूपमे आ साउथ ग्रुपकेँ भुगतान कयल गेल घुसक वसूली करबाक आ एहि सम्पूर्ण षड्यंत्रसँ लाभ उठयबाक लेल कहलक। एहि मामलामे शरथ रेड्डी, राघव मगुंटा आ मगुंटा श्रीनिवासुलु रेड्डी गवाह बनि गेल। प्रवर्तन निदेशालय दावा कयलक जे पीएमएलएक धारा ५० केर अन्तर्गत दर्ज श्रीनिवासुलु रेड्डी केर १४ जुलाई, २०२३ केर बयान आ धारा १६४ केर अंतर्गत दर्ज कयल गेल श्रीनिवासुलु रेड्डीक १७ जुलाई २०२३ केर बयानक अनुसार कविता आ आरो कतेको आपक शीर्ष नेताकेँ घुस देलक।
पूरा मामला इ अछि जे दिल्लीक नव आबकारी नीति २०२१/२२क निर्माण आ कार्यान्वयनमे घोटालाक आरोपक बाद दिल्लीक उपराज्यपाल विनय कुमार सक्सेना २० जुलाई, २०२२ केँ एहि मामिलाक सीबीआई जाञ्चक सिफारिश कयलनि। जकर बाद सीबीआई १७ अगस्त २०२२ केँ शिकायत दर्ज कयलक। जाहिमे तत्कालीन उपमुख्यमंत्री मनीष सिसोदियाकेँ आरोपी नम्बर १ बनाओल गेल छल।
आरोप अछि जे आबकारी नीतिक निर्माणक चरणक दौरान पूर्व उपमुख्यमंत्री सिसोदिया आ अन्य अज्ञात आ अनाम निजी व्यक्ति/संस्था सहित आम आदमी पार्टीक नेता लोकनि द्वारा आपराधिक षड्यंत्र रचल गेल छल आ साउथ लॉबीक शराब व्यापारी सभकेँ फायदा पहुंचायल गेल छल। बदलामे घूस लऽ कऽ चुनावमे करोड़ो रुपया खर्च कयल गेल।
आम आदमी पार्टीक दूटा पैघ नेता संजय सिंह आ मनीष सिसोदिया आबकारी मामिलामे पहिनेसँ जेलमे छथि। सीबीआई लम्बा पूछताछक बाद २६ फरवरी २०२३ केँ मनीष सिसोदिया आ ४ अक्टूबर २०२३ केँ ईडी संजय सिंहकेँ गिरफ्तार कयने छल।
