प्रधानमंत्री नरेन्द्र मोदी कहलनि अछि जे ओ सदैव युवासभमे विश्वास करैत आबि रहल छथि आ युवाक सपनाकेँ साकार करबाक लेल हुनक सरकार एहन निर्णय लेने अछि जे पूर्ववर्ती सरकारक समयमे असंभव मानल जाइत छल।
ओ देशक युवासभसँ आग्रह कयलनि जे ओ ‘मेरा युवा भारत’ सङ्गठनमे शामिल होथि आ आगामी लोकसभा चुनावक लेल भाजपाक घोषणापत्र तैयार करबाक लेल ‘नमो ऐप’क माध्यमसँ अपन सुझाव सेहो पठाउ।
ओ कहलनि जे ओ नीक सुझाव देनिहार युवासभसँ भेंट आ बातचीत सेहो करताह।
भारतीय जनता युवा मोर्चा (भाजयुमो) द्वारा देशभरिमे ५,८०० जगह पर आयोजित ‘नमो नव मतदाता सम्मेलन’सँ जुड़ल ५० लाखसँ बेसी पहिल बेर मतदाताकेँ वीडियो कॉन्फ्रेंसिंग केर माध्यमसँ संबोधित करैत प्रधानमंत्री मोदी युवा सभसँ आगामी लोकसभा चुनावमे मतदान करबाक आग्रह कयलथि।
मोदी कहलनि, “आइ जखन देशक लक्ष्य २०४७ धरि विकसित भारत बनबाक अछि, अहाँक वोट भारतक दिशा निर्धारित करत। जहिना १९४७ सँ २५ साल पहिने देशकेँ स्वतंत्र बनयबाक जिम्मेदारी भारतक युवा पर छल, तहिना २०४७ धरि २५ सालमे विकसित भारतक निर्माणक जिम्मेदारी अहाँपर अछि। अहाँक एक वोट आ देशक विकासक दिशा दुनू एक दोसरासँ जुड़ल अछि। अहाँक एक वोट भारतकेँ दुनियाक तेसर सबसँ पैघ अर्थव्यवस्था बना देत। अहाँक एक वोटसँ भारतमे स्थिर आ पैघ बहुमतक सरकार आओत। अहाँक एक वोट भारतमे तीव्र सुधारक गतिकेँ आओर तेज करत। अहाँक एक वोट डिजिटल क्रांति केर आओर सक्रिय करत। अहाँक एक वोट असगर भारतकेँ अन्तरिक्षमे लऽ जायत। अहाँक एक वोट भारतमे पहिल यात्री विमानक निर्माण करत। अहाँक एक वोटसँ दुनियामे भारतक प्रतिष्ठा बढ़त।”
देशमे पूर्ण बहुमतक संग एकटा मजबूत आ स्थिर सरकारक फायदाक गिनती करैत प्रधानमंत्री कहलनि, “जँ स्थिर सरकार होइत अछि तँ देश पैघ निर्णय लैत अछि, दशकसँ लटकल समस्याक समाधान करैत अछि आ आगू बढ़ैत अछि। हमर पूर्ण बहुमत वला सरकार जम्मू-कश्मीरमे अनुच्छेद ३७० हटा कऽ दशकों केर प्रतीक्षा समाप्त कयलक।
हमर पूर्ण बहुमतक सरकार सेनाक जवानक लेल वन रैंक, वन पेंशन लागू कऽ देशक पूर्व सैनिकक चारि दशकक प्रतीक्षाकेँ समाप्त कऽ देलक। हमरासभ लग पूर्ण बहुमतक सरकार अछि जे नारी शक्ति वन्दन अधिनियम लागू कऽ देशक महिलासभक बरखसँ चलि रहल प्रतीक्षाकेँ समाप्त कऽ देलक। ई हमर सरकार अछि जे तीन तलाक कानून बना कऽ मुस्लिम बहिन-बेटीसभमे न्यायक आशा जगा देलक। ई हमर सरकार अछि जे तीन दशकक प्रतीक्षाक बाद नव राष्ट्रीय शिक्षा नीति लागू कयलक अछि। ई हमर सरकार अछि जे एससी, एसटी, ओबीसीक हितक रक्षा करैत गरीब युवाक लेल १० प्रतिशत आरक्षणक प्रावधान कयलक। अयोध्यामे रामललाक प्राण-प्रतिष्ठा देखबाक अवसर हमर सरकारकेँ भेटल।”
प्रधानमंत्री मोदी विपक्षी दलसभ पर सेहो भयंकर हमला कयलनि, युवासभकेँ अपन सरकारक उपलब्धिक सङ्ग-सङ्ग २०१४ सँ पहिने भारत आ प्रधानमन्त्री बनलाक बाद भारतक अन्तर बतौलनि।
ओ कहलनि जे आइ हम जाहि उपलब्धिक बात कऽ रहल छी, २०१४ सँ पहिनेक पीढ़ी एकर आशा छोड़ि देने छल। पहिने भ्रष्टाचार आ घोटालाक समाचार हेडलाइन बनैत छल। करोड़ो रुपयाक घोटाला आम बात छल। ओ कहलनि जे हुनका खुशी अछि जे ओ देशकेँ ओहि अन्हार स्थितिसँ बाहर निकालि सकलाह। आइ भ्रष्टाचारक बात नहिं होइत अछि, विश्वसनीयताक बात होइत अछि। आइ घोटालाक बात नहिं होइत अछि, अपितु सफलताक बात होइत अछि।
ओ परिवारवाद दलकेँ युवा विरोधी कहैत विपक्षी दलक आलोचना कयलनि। “एतेक रास युवाक सङ्ग बातचीत करबाक ई हमर जीवनक पहिल अवसर अछि आ संभवतः दुनियाक कोनो राजनेताक लेल पहिल अवसर अछि,” ओ युवासभकेँ स्वयंकेँ वोट देबाक सङ्ग-सङ्ग दोसरकेँ मतदान करबाक लेल प्रेरित करबाक आह्वान कयलनि। हम सभ नव मतदाताकेँ नमन करैत छी। १८ सँ २५ वर्षक आयु एहन होइत छैक जखन व्यक्तिक जीवनमे बहुत रास परिवर्तन होइत छैक। एहि परिवर्तनक बीच अहाँ सबकेँ मिलि कऽ एकटा आओर जिम्मेदारी निभाबय पड़त। ई जिम्मेदारी दुनियाक सबसँ पैघ लोकतंत्रक भागीदारी अछि। ई कालचक्र दूटा कारणसँ बहुत महत्वपूर्ण अछि – पहिल, अहाँ सभ एहन समयमे मतदाता बनलौंह, जखनि भारतक अमृतकाल शुरू भऽ गेल अछि। दोसर बात जे २६ जनवरीकेँ देश अपन ७५म गणतंत्र दिवस मनाओत। अगिला २५ साल अहाँ लेल सेहो आ भारतक लेल सेहो महत्वपूर्ण अछि।
