कांग्रेस नेता राहुल गांधी बृहस्पतिकेँ विश्वास व्यक्त कयलनि जे विपक्षी गठबन्धन इंडिया देश भरिमे अन्यायक विरुद्ध मिलिकऽ लड़त। एक दिन पहिने ‘इंडिया’क घटक तृणमूल कांग्रेसक अध्यक्ष ममता बनर्जी राज्यमे अकेले लोकसभा चुनाव लड़बाक घोषणा कयलनि।
राहुल गाँधीक नेतृत्वमे कांग्रेसक भारत जोड़ो न्याय यात्रा बृहस्पतिकेँ असमसँ पश्चिम बङ्गालमे प्रवेश कयलक आ कूच बिहार जिलाक बशीरहाट पहुँचल। प्रदेश कांग्रेस अध्यक्ष अधीर रंजन चौधरी गाँधीक एतय पहुँचला पर गर्मजोशीसँ स्वागत कयलनि।
भारतीय जनता पार्टी (भाजपा) आ राष्ट्रीय स्वयंसेवक संघ (आरएसएस) पर एहि अवसर पर नफरत आ हिंसाकेँ बढ़ावा देबाक आरोप लगबैत कांग्रेसक पूर्व अध्यक्ष कहलनि जे ‘न्याय’ शब्द यात्रासँ एहि लेल जोड़ल गेल अछि किएक तँ “देश भरिमे अन्याय प्रचलित अछि”। “भाजपा आ आरएसएस नफरत आ हिंसा पसारि रहल अछि। हमसभ यात्रामे ‘न्याय’ शब्द जोड़ने छी किएक तँ देश भरिमे अन्याय व्याप्त अछि। ‘इंडिया’ गठबंधन पूरा देशमे अन्याय केर खिलाफ लड़त।”
पश्चिम बंगालक मुख्यमंत्री ममता बनर्जी बुधदिन अचानक घोषणा कयलनि जे हुनकर पार्टी पश्चिम बंगालमे अकेले लोकसभा चुनाव लड़त। इ विपक्षी गठबंधनकेँ चौंका देलक। एकर बाद कांग्रेसक प्रतिक्रिया आयल जे ममता बनर्जीक बिना ‘इंडिया’ गठबंधनक कल्पना नहिं कयल जा सकैत अछि। तृणमूल कांग्रेस राहुलक यात्राक विषयमे सूचनाक अभावक हवाला दैत कहलक अछि जे ओ एहिमे भाग नहिं लेत। राज्य आ ‘इंडिया’ गठबंधनमे कांग्रेसक सहयोगी माकपा आ अन्य वाम दलक ‘भारत जोड़ो न्याय यात्रा’मे भाग लेबाक सम्भावना अछि।
पश्चिम बंगालमे ई यात्रा ५२३ किलोमीटरक दूरी तय करैत छह जिला आ छओ लोकसभा निर्वाचन क्षेत्रसँ गुजरत। अप्रैल-मई २०२१मे पश्चिम बङ्गालमे विधानसभा चुनावक बाद राहुल गाँधीक ई पहिल प्रदेश दौरा अछि।
