‘कारगिल वीर आवास’क नाम पर 100 सँ बेसी पूर्व सैनिकसँ करोड़ोंक ठगीक आरोप, पटना पुलिस कार्रवाईमे जुटल
पटना । समदिया
बिहारक राजधानी पटनाक बिहटा क्षेत्रमे पूर्व सैनिकसभकेँ जमीन देबाक सपना देखाकऽ कथित रूपसँ करोड़ों रुपयाक ठगीक मामिला सामने अएलाक बाद ‘कारगिल वीर आवास’ फेर विवादमे आबि गेल अछि। एहि संबंधमे पूर्व सैनिक राघवेंद्र कुमारक आवेदनक आधार पर अमहरा थाना पुलिस मामिला दर्ज कऽ जांच शुरू कऽ देलक अछि।
शिकायतकर्ता राघवेंद्र कुमारक आरोप अछि जे ‘सैनिक वेलफेयर ऑर्गेनाइजेशन इंडिया लिमिटेड’क नाम पर करीब 100 पूर्व सैनिककेँ जमीन देबाक भरोस देल गेल। संस्थाक चेयरमैन रिटायर्ड लेफ्टिनेंट कर्नल राकेश राणा आ अधिकृत प्रतिनिधि रिटायर्ड कैप्टन अर्जुन कुमार सिंह पर ठगीक आरोप लगाओल गेल अछि।
राघवेंद्र कुमारक कहब अछि जे वर्ष 2013मे हुनका ‘कारगिल वीर आवास सोसाइटी’क जानकारी भेटल छल। एहि सोसाइटीक परियोजना बिहटाक बिलाप गाममे अछि। ओ संस्थासँ जुड़ल रिटायर्ड कर्नल राकेश राणा आ अर्जुन कुमार सिंहसँ संपर्क कएलनि आ 1200 वर्गफुट जमीनक प्लॉटक लेल करीब 6.38 लाख रुपया देलनि। आरोप अछि जे वर्ष 2016मे जमीनक एग्रीमेंट आ रजिस्ट्रीक प्रक्रिया पूरा भेलाक बादो आइ धरि हुनका प्लॉटक कब्जा नहि भेटलनि।
पीड़ितक अनुसार, जखनि ओ प्लॉटक कब्जा लेबाक प्रयास कएलनि तखनि आरोपीसभ स्थानीय किसानसभक विवादक हवाला दऽ मामिला टारैत रहल। हुनक दावा अछि जे हुनका एहेन 100 सँ बेसी पूर्व सैनिक एहि सोसाइटीमे जमीनक लेल एग्रीमेंट करौने छथि, मुदा एखनि धरि ककरो जमीनक कब्जा नहि देल गेल अछि। एहि परियोजनासँ करीब 32 बीघा जमीन जुड़ल बताओल जा रहल अछि।
एहि मामलामे स्थानीय किसानसभ सेहो जमीनक कब्जा आ मुआवजाक मुद्दा पर अदालतक शरणमे गेल छथि। किसानसभक आरोप अछि जे हुनका नहिं उचित मुआवजा देल गेल आ नहिं जमीनक अधिग्रहण लेल हुनकर सहमति लेल गेल।
पीड़ित पूर्व सैनिकसभक आरोप अछि जे मुख्य आरोपी रिटायर्ड कर्नल राकेश राणा पूर्वमे सेहो एहेन धोखाधड़ीक मामिलामे संलिप्त रहल छथि। हुनका पर ओडिशामे सेहो सैनिकसभसँ जमीनक नाम पर कथित ठगी करबाक आरोप लगाओल गेल अछि। हालांकि, एहि आरोपसभक स्वतंत्र पुष्टि पुलिस जांच पूरा भेलाक बादे स्पष्ट भऽ सकत।
ठगीक मामिला सामने अएलाक बाद दानापुर छावनी स्थित संस्थाक कार्यालय बंद भेटल अछि। पीड़ितसभक आरोप अछि जे कार्यालयमे ताला लगा कऽ आरोपी आ हुनकर सहयोगी फरार भऽ गेल अछि। अर्जुन कुमार सिंह पर सेहो फोन नहि उठेबाक आरोप अछि।
दानापुर एसडीपीओ-2 अमरेंद्र कुमार झाक अनुसार, पूर्व सैनिक राघवेंद्र कुमारक आवेदनक बाद पुलिस कांड संख्या 54/26 दर्ज कऽ जांच शुरू कएलक। जांचमे आरोपक प्राथमिक रूपसँ पुष्टि भेलाक बाद आरोपी रिटायर्ड लेफ्टिनेंट कर्नल आ हुनकर अन्य सहयोगीसभक विरुद्ध कार्रवाई तेज कऽ देल गेल अछि।
पुलिसक अनुसार आरोपीसभक गिरफ्तारी लेल आवश्यक कार्रवाई कएल जा रहल अछि आ शीघ्रे गिरफ्तारीक प्रयास कएल जाएत। पुलिस पूर्व सैनिकसभसँ अपील कएलक अछि जे जमीन अथवा आवासक नाम पर कोनो संदिग्ध योजना देखलाक बाद बिना जांच-पड़तालक रुपया नहि लगाउ आ ठगीक आशंका होएत देरी पुलिसकेँ सूचना दिअ।
पुलिस जांचक बादे एहि बहुचर्चित ठगीक पूरा सच सामने आओत।
