कांग्रेस नेता राहुल गांधी भारत जोड़ो न्याय यात्राक संग अम्बिकापुर पहुँचलाह। अम्बिकापुरमे एकटा जनसभाकेँ सम्बोधित करैत ओ कहलनि, “आइ किसान दिल्ली दिस कूच कऽ रहल छथि। हुनका सभकेँ रोकल जा रहल अछि, हुनका सभ पर आंसू गैसक गोला छोड़ल जा रहल अछि, ओ की कहि रहल छथि। ओ सभ मात्र अपन श्रमक फल माँगि रहल छथि। भाजपा सरकार एमएस स्वामीनाथनकेँ भारत रत्न देबाक घोषणा कयलक, मुदा ओ एमएस स्वामीनाथनक कहल बातकेँ लागू करबा लेल तैयार नहिं अछि।”
राहुल गांधी कहलनि, “स्वामीनाथन अपन रिपोर्टमे साफ कहने छथि जे किसानकेँ वास्तवमे एमएसपीक कानूनी अधिकार भेटबाक चाही, मुदा भाजपा सरकार ई नहिं कऽ रहल अछि। जखन इंडियाक सरकार सत्तामे आओत, तखन हम भारतक किसानसभकेँ एमएसपीक गारंटी देबयवाला कानून देब। स्वामीनाथन रिपोर्टमे जे उल्लेख कयल गेल अछि ओकरा हम पूरा करब।”
अम्बिकापुर शहरक कला केन्द्र मैदानमे आयोजित आम सभाक बाद राहुल गाँधीक भारत जोड़ो न्याय यात्रा अचानक स्थगित कऽ देल गेल अछि। दिल्लीमे किसान आन्दोलनमे विवाद उत्पन्न भेलाक बाद राहुल गाँधी आ कांग्रेस अध्यक्ष मल्लिकार्जुन खड़गेकेँ दिल्ली जाय पड़ि रहल अछि।
अम्बिकापुरमे जनसभाक बाद राहुल गाँधीक यात्रा बलरामपुर जिलाक लेल प्रस्थान करय बला छल, तखन अचानक यात्रा स्थगित कऽ देल गेल। बलरामपुरक बाद यात्रा झारखण्ड राज्यमे प्रवेश करबाक छल। यात्रा फेर कहिया शुरू होएत ? एहि बारेमे एखन धरि किछु नहिं कहल गेल अछि। राहुल गाँधी राष्ट्रीय अध्यक्ष मल्लिकार्जुन खड़गेक सङ्ग अम्बिकापुर दरिमा हवाई अड्डासँ दिल्ली लेल प्रस्थान कयलनि।
