बिहारक ६ टा राज्यसभाक सीटपर चुनाव होबयवला अछि। एहनमे दल सभ अपन उम्मीदवारकेँ घोषणा कयलक अछि।
जेडीयू हालेमे राजगमे शामिल भेल अछि। नीतीश कुमार सोमकेँ बिहार विधानसभामे शक्ति परीक्षण सेहो पास कऽ चुकल छथि। एम्हर खबरि आबि रहल अछि जे जेडीयूसँ पूर्व मंत्री आ नीतीश कुमारक करीबी संजय झा राज्यसभा जयताह। एहिसँ पहिने भाजपा अपन दूटा उम्मीदवारकेँ राज्यसँ राज्यसभामे पठयबाक घोषणा कऽ चुकल अछि। पूर्व मंत्री भीम सिंह आ धर्मशीला गुप्ताक नामक घोषणा भाजपा द्वारा भेल अछि। आब एनडीए केर ई तीनू उम्मीदवार आइ अर्थात १४ फरवरीकेँ नामांकन दाखिल करत। एहि सभ उम्मीदवारक नामांकन विधानसभाक सचिव कक्षमे कयल जायत। एहि अवसर पर मुख्यमंत्री नीतीश कुमार, हुनक दूटा उप मुख्यमंत्री सम्राट चौधरी आ विजय कुमार सिन्हा समेत एनडीए केर कतेक वरिष्ठ नेता सभ उपस्थित रहताह।
बिहारसँ राज्यसभाक छओ सीटक लेल चुनाव भऽ रहल अछि। नामांकन दाखिल करबाक अंतिम तिथि १५ फरवरी अछि। विधायकक संख्याक आधार पर बिहारक छओमेसँ तीन-तीन राज्यसभा सीट एनडीए आ महागठबंधनकेँ भेटत। एहिमेसँ भाजपाक २, राजदक २ आ जेडीयूक १ सीट तय मानल जा रहल अछि। ओतहि बाकी एकटा पर एखनि तक किनको दावेदारी नहिं भेल अछि।
