कांग्रेस पार्टीक आह्वान पर सांसदक निलंबन पर मधुबनी समाहरणालय पर इंडिया गठबंधनक धरना

सांसदक निलंबन वापस लिअ, लोकतंत्र पर हमला नहिं सहब – पाठक

*

मधुबनी समदिया

*

लोकसभा आ राज्य सभासँ १५० सांसदक निलंबन के ल’ अखिल भारतीय कांग्रेस कमिटीक आह्वान पर इंडिया गठबंधनक सभ राजनीतिक दल शुक्र दिन मधुबनी समाहरणालयक समक्ष अंबेडकर प्रतिमा लग एक दिवसीय धरना – प्रदर्शन कयलक अछि। कांग्रेस जिलाध्यक्ष मनोज कुमार मिश्र, जदयू जिलाध्यक्ष सत्येंद्र कामत, भाकपा जिला मंत्री मिथिलेश झा, राजद जिलाध्यक्ष वीर बहादुर राय, माकपा जिला मंत्री मनोज यादव आर भाकपा माले जिला सचिव ध्रुव नारायण कर्ण केर संयुक्त नेतृत्व आ अध्यक्षतामे आयोजित एहि धरना प्रदर्शन सभाकेँ संबोधित करैत एक दिससँ सभ वक्ता सभ कहला जे संसद भवनक सुरक्षामे भेल चूक के ल’ विपक्षी सांसद सभ द्वारा कयल जा रहल सवाल आर गृहमंत्रीसँ जवाब मांगला पर भाजपा केर मोदी सरकार लगातार दुनू सदनक सांसद सबहक निलंबन करैत जा रहल अछि। जे, संविधान आ लोकतंत्र पर हमला अछि। भाजपा सरकार विपक्ष विहीन संसद बनेबाक साजिश कय रहल अछि। एहि अवसर पर कांग्रेस पार्टी केर पूर्व मंत्री कृपानाथ पाठक कहलैन्ह जे लोकतंत्र खतरामे अछि। सरकार तऽ अबैत जाइत रहैत अछि। मुदा, सरकार संविधानक आधार पर अपन काज करैत रहैत अछि। मुदा, भाजपा केर मोदी सरकार संवैधानिक संस्थाक दुरुपयोग कय विपक्षक सांसद पर दमनात्मक कार्रवाई करैत अछि जे लोकतंत्रक आत्मा पर प्रहार अछि। ओतै जदयू जिलाअध्यक्ष सत्येंद्र कामत कहलैन्ह जे बेरोजगारी के ल’ सांसद सवाल करैत छैथ तऽ हुनका निलंबित कय देल जाइत अछि। राजद जिलाध्यक्ष वीर बहादुर राय कहलैन्ह जे मोदी सरकार संसदमे विपक्षी सांसद सभकेँ निकालि कय विपक्ष विहीन संसद चाहैत अछि। भाकपा माले जिला सचिव ध्रुब नारायण कर्ण कहलैन्ह जे मोदी सरकार तानाशाही रवैया अपना कय लोकतंत्रकेँ कुचलय चाहैत अछि। भाकपा जिलामंत्री मिथिलेश झा कहलैन्ह जे भाजपा केर मोदी सरकार देशमे तानाशाही लाबय चाहि रहल अछि। माकपा जिला मंत्री मनोज यादव कहलनि लोकतंत्र केर जीवंत रखबाक लेल भाजपा सरकारकेँ देश हितमे जयबाक चाही। जिला कांग्रेस अध्यक्ष मनोज कुमार मिश्र कहलैन्ह जखनि हमर नेता संसदक सुरक्षा, बेरोजगारी, अडानी केर भ्रष्टाचार पर बात करैत छैथ तऽ हुनका अलोकतांत्रिक ढंगसँ बाहरक रास्ता देखा देल जाइत अछि।

एहि कार्य्रकमकेँ मुख्य रूपसँ भाकपा राज्य परिषद सदस्य कृपानंद झा आजाद, अधिवक्ता संजय मिश्र, उप महापौर अमानुल्लाह खान, राजदेव रमन, राजकुमार यादव, कृष्णकांत झा गुड्डू, राजकिशोर साफी, राम बहादुर यादव, रेणु कुमारी, मीनू पाठक, फुलदेव यादव, लक्ष्मी देवी, अब्दुल कयूम, विक्रम शीला यादव, ईश्वर गुरमैता रानी कुमारी, वशिष्ठ मंडल, ज्योति रमन झा बाबा, अहमद हुसैन, ज्योति झा, अजय राय, प्रजापति झा, कौशल चौधरी, रामबाबू यादव, उपेंद्र कामत, चंदेश्वर चौधरी, अशोक कुमार, मनोज मिश्र, अहमद हुसैन, आनंद झा, अकिल अंजुम, सङ्ग इंडिया गठबंधन दलक दर्जनो नेता सभ संबोधित केलैन्ह। एहि अवसर पर सैकड़ो कार्यकर्ता सभ उपस्थित छलाह।