मुजफ्फरपुरमे बैंक लूटय आयल बदमाश सुरक्षा गार्डकेँ मारलक गोली आ राइफल लूटि कऽ भागल

मुजफ्फरपुर समदिया
*

शुक्रदिन जिलाक कांटी क्षेत्रमे पंजाब नेशनल बैंककेँ लूटबाक लेल आयल अज्ञात हमलावर एकटा सुरक्षा गार्डकेँ गोली मारि देलक। एहि दौरान बदमाश सभ गार्डक राइफल सेहो लूटि लेलक। घायल गार्डकेँ एसकेएमसीएचमे भर्ती करायल गेल अछि। राहतक बात ई जे बैंकसँ नकदी लूटल नहिं जा सकल। प्रायः गार्डक विरोध आ बहादुरीक कारण बैंकसँ ई राशि नहिं लूटल जा सकल। सूचना पर कांटी थानाक पुलिस वरिष्ठ पुलिस अधिकारीक संग घटनास्थल पर पहुँचल आ जाँच शुरू कऽ देलक। लगपासमे लागल सीसीटीवी कैमराक जाँच कयल जा रहल अछि। एसएसपी राकेश कुमार कहलनि जे राशि लूटल नहिं गेल अछि। एकटा गार्डकेँ गोली मारि देल गेल, जे अस्पतालमे भर्ती छथि। बदमाश सभक गिरफ्तारी लेल एकटा विशेष दल छापा मारि रहल अछि। कहल गेल जे बाइक सवार कांटी नगर परिषद क्षेत्रक कांटी ओवरब्रिज लग पंजाब नेशनल बैंक लूटबाक लेल बाइकर्स बदमाश पहुँचल छल। बैंकमे प्रवेश करैत गार्ड विरोध केलक। एहि पर शरारती तत्व सभ हुनका गोली मारि देलक। गोली गार्डक जांघमे लागल। घटनाक बाद क्षेत्रमे अफरातफरी मचल । दोसर दिस, घटनाक सूचना भेटैत पुलिसक टीम घटनास्थल पर पहुँचि गेल। आईजी शिवदीप लांडे स्वयं पुलिस बलक संग घायल गार्डक स्थिति जानबा लेल अस्पताल पहुँचलाह। गार्डसँ सेहो पूछताछ कयल जा रहल अछि जाहिसँ घटनाक पूरा जानकारी भेटि सकय। डकैतीक बारेमे एखन धरि कोनो पुष्टि नहिं भेल अछि। पुलिस मामिलाक जांचमे जुटल अछि।