दरभंगा राज केर मंदिरक करोड़ो मूल्यक गहना बेचबाक आरोपमे तीन गोटे बंदी

दरभंगा समदिया

*

दरभंगा राजपरिवारक १०८ मन्दिरक करोड़ो टाकाक गहना धोखाधड़ीसँ बैंक लॉकरसँ निकालि बेचि देल गेल। राजकुमार कपिलेश्वर सिंह मंगल दिन विश्वविद्यालय पुलिस स्टेशनमे बैंक लॉकरसँ अनधिकृत रूपसँ करोड़ोक गहना निकालय आ बेचय केर मामिलामे एफआईआर दर्ज कयलनि। तकर बाद, पुलिस सोना-चानीक गहना किननिहार दोकानदार सहित तीनटा व्यक्तिकेँ गिरफ्तार कयलक। सदर एसडीपीओ अमित कुमार बतौलनि जे गिरफ्तार कयल गेल लोकमे मधुबनी जिलाक मंगरौनी निवासी उदयनाथ झा उर्फ विष्णु (कामेश्वर धार्मिक न्यासक न्यासी महारानी अधिरानी कामसुन्दरी देवीक संबंधी), ट्रस्ट मैनेजर केदार नाथ मिश्र आ लहेरियासराय थाना क्षेत्रक रहमगंज निवासी जौहरी शत्रुघ्न प्रसाद सम्मिलित अछि। पुलिस दरभंगा टॉवर स्थित शत्रुघ्न प्रसादक दोकानसँ १.६ किलो सोना आ ३३ किलो चानी जब्त कयलक अछि। एहि मामिलामे कतेको सफेदपोश सेहो शामिल होयबाक आशंका अछि। पुलिस ओकरा सभकेँ खोजि रहल अछि। सदर एसडीपीओ अमित कुमार विश्वविद्यालय पुलिस स्टेशनमे बंदी तीनू आरोपीसँ गहन पूछताछ कयलनि। उदयनाथ झा उर्फ विष्णु निर्दोष होयबाक बात कहलक, ओ कहलक “हम अनाधिकृत रूपसँ गहना नहिं निकाललहुं आ ने बेचलहुं। हम जे केलहुं ओकर लेल हमरा लग पावर ऑफ अटॉर्नी अछि। सब किछु एकरा तहत कएल गेल अछि। आरोप निराधार अछि।” जौहरी शत्रुघ्न प्रसाद कहलक, “उदयनाथ झा उर्फ विष्णुसँ हुनक पुरान सम्बन्ध अछि। किछु दिन पहिने ओ गहना अनलनि आ बेचबाक लेल कहलनि। आभूषणक उचित मूल्य जानबाक लेल एकरा पिघलायब आवश्यक छल। ई सलाह देलापर ओ सभ गहना देबाक लेल तैयार भऽ गेलाह। आभूषणक पिघलेलासँ प्राप्त सोना-चानीक मूल्य ८८ लाख टाका निर्धारित कयल गेल । पाइ माँगला पर उदयनाथ झासँ गहनाक दस्तावेज मँगलयनि। हुनका सभकेँ आइ कागज देबाक छल। चेक भुगतानक लेल तैयार छल एम्हर पुलिस कार्रवाई केलक।” दरभंगा महाराजक उत्तराधिकारी राजकुमार कपिलेश्वर सिंह विश्वविद्यालय पुलिस स्टेशनमे दर्ज एफआईआरमे कामेश्वर सिंह धार्मिक न्यासक नियम आ विनियम केर हवाला दैत कहलनि कि जँ रानी अस्वस्थ छथि वा कोनो आन मजबूरी अछि तऽ राजपरिवारक पुरुष सदस्य बैंकमे राखल लॉकर खोलि सकैत अछि। ओ इहो कहलनि जे स्टेट बैंक दरभंगाक मुख्य शाखामे राखल लॉकर खोलि एक पखवाड़ा पहिने आभूषण हटा देल गेल छल। रानी बहुत वृद्ध छथि, मानसिक स्थिति सेहो ठीक नहिं छनि। एकर फायदा उठबैत धोखाधड़ी कएल गेल अछि। मंगलदिन रामबाग किलामे कामेश्वर धार्मिक न्यासक कार्यालयक विभिन्न कोठरीमे ताला लागल छल। एहिसँ पहिने राजकुमार कपिलेश्वर सिंह दर्जनों लोकक संग धार्मिक न्यासक कार्यालय पहुँचल छलाह। कार्यालयक भ्रमणक क्रममे ओ देखलनि जे धरोहरक श्रेणीमे आबयवला बहुत रास मूल्यवान कलाकृति आ वस्तु उपलब्ध नहिं अछि। कार्यालय सहित विभिन्न कक्षमे ताला लागल छल।