डीएम अरविंद कुमार वर्मा आ एसपी सुशील कुमार बुध दिन प्रशासनिक अमला सङ्ग बेनीपट्टी प्रखंडक एसके चौधरी शिक्षा न्यास द्वारा संचालित कॄषि विज्ञान केंद्र चानपुरा बसैठमे आबए वला 9 फरवरी कय बिहारक राज्यपाल राजेंद्र विश्वनाथ अर्लेकरक आगमनक ल’ सुरक्षा, विधि-व्यवस्था आर अन्य तरहक तैयारीक जायजा लेबाक लेल स्थल निरीक्षण केलैन्ह। जनतब दी जे राज्यपाल अर्लेकर कृषि विज्ञान केंद्रमे देशक नामी गिरामी शिक्षाविद डॉ. संत कुमार चौधरी दिससँ आबए वला 9 सँ 11 फरवरी धरि आयोजित तीन दिवसीय अंतर्राष्ट्रीय कृषि, शिक्षा आर स्वास्थ्य अमृत महोत्सव सह मेगा एग्री एक्सपो कार्यक्रमक प्रथम दिन उद्घाटन करबाक लेल एहि केंद्र पर पहुंच रहल छैथ। कार्यक्रमक पहिल दिनक उद्घाटन शिक्षा न्यासी डॉ. चौधरी राज्यपालक हाथसँ कराबय जा रहल छैथ। राज्यपालक हेलीकॉप्टर बसैठ अवस्थित सीता मुरलीधर उच्च विद्यालयक मैदान पर 9 फरवरी कय शुक्र दिन प्रातः 10 बजे उतरत। एतएसँ विशेष वाहनसँ राजपाल कार्यक्रम स्थल धरि पहुंचताह। 11 बजे राज्यपाल कार्यक्रमक उद्घाटन करताह। उद्घाटन, भाषण, अल्पाहारक उपरांत राज्यपाल सांझुक पहरि 4 बजे केंद्रसँ हेलीपैड धरि जेताह आर हेलीकॉप्टरसँ फेर पटना वापस लौट जेताह। एहि के ल’ डीएम वर्मा, एसपी कुमार शिक्षा न्यासी डॉ. चौधरी, एसडीओ मनीषा, डीएसपी नेहा कुमारी, विधुत्त कार्यपालक अभियंता मो. अरमान, एसीएमओ डॉ. आरके सिंह, सहायक विधुत्त अभियंता सुनील कुमार, आरडब्लूडी बेनीपट्टीक सहायक अभियंता शिवानी कुमारी, प्रखंड उप प्रमुख अशोक कुमार चौधरी, सीओ पल्लवी कुमारी गुप्ता, पीएचसी प्रभारी डॉ. पीएन झा, बेनीपट्टी थानाध्यक्ष इंस्पेक्टर गौतम कुमार, बसैठ पंचायतक मुखिया मो. जिलानी आजाद सङ्ग मुख्य कार्यक्रम स्थल, मंच, बाट, हुनकर ठहराव हेलिपैड सबहक जायजा लेलैन्ह। एहि क्रममे हुनका सङ्ग भवन, बिजली, आरडब्लूडी सङ्ग अन्य संबंधित विभागक अधिकारी आ कर्मी सभ उपस्थित छलाह।
एहि क्रममे डीएम वर्मा आर एसपी कुमार केंद्रक निदेशक सह शिक्षा न्यासी डॉ चौधरीसँ कृषि विज्ञान केंद्र अवस्थित मुख्य कार्यक्रम स्थल, मंच, रास्ता, राज्यपालक ठहराव स्थल, कार्यक्रम स्थलक मुख्य प्रवेश द्वार, विशेष प्रवेश द्वार, मंच आ मंचसँ आमलोकक बैसबाक दूरी, डी एरिया लेल जगह, कार्यक्रममे उपस्थित होमय वला लोकक अनुमानित संख्या, राज्य पालक ठहराव, अल्पाहार, भोजन, विशेष अतिथि सबहक बैसबाक, ठहरबाक, भोजनक व्यवस्था, निर्बाध गतिसँ बिजलीक आपूर्ति, पेयजल, शौचालय मिनट टू मिनट निर्धारित कार्यक्रमक प्रकार, कार्यक्रम स्थल पर लागयवला विभिन्न स्टॉल, जामसँ बचाव लेल वाहन पार्किंग, आवश्यक जगह पर बैरिकेडिंग, मंचक समीप राज्यपालक अतिरिक्त विशेष अतिथि सबहक बैसबाक स्थान, मीडियाकर्मी सबहक स्थान सङ्ग अन्य व्यवस्थाक बारेमे जनतब लेलैन्ह आर सुरक्षात्मक दृष्टिकोणसँ अन्य एहतियात बरतबाक लेल आवश्यक निर्देश देलैन्ह। डीएम आ एसपी सुरक्षाक दृष्टिसँ मंचसँ दूरी बना कय लोककेँ बैसबाक, संस्था द्वारा संतुष्ट लोकसँ राज्यपालक स्वागत करेबाक, प्रवेशसँ पूर्व लोकक पहचान लेल मुख्यद्वार पर संस्थाक कर्मी तैनात रखबाक, राज्यपालक मंच धरि पहुंच पथकेँ आम लोकक आवागमनसँ दूर रखबाक, राज्यपालक कार्यक्रम क्रममे संस्थाक अधिकारी आ कर्मी सङ्ग अतिरिक्त विशेष लोकक लेल संस्था दिससँ पहचान पत्र जारी करबाक निर्देश देलैन्ह। डीएम आ एसपी एसडीओ मनीषा आर डीएसपी नेहा कुमारीकेँ सुरक्षा, ड्राप गेट, इंट्री गेट, कार्यक्रम स्थल पर पर्याप्त संख्यामे मजिस्ट्रेटक नेतृत्वमे पुलिस बलक तैनाती रखबाक, राज्यपालक कार्यक्रम स्थल धरि आबए जाय वला बाटकेँ स्वयं विधि-व्यवस्था देखैत रहबाक निर्देश देलैन्ह। बिजली विभागक अधिकारीकेँ डीएम निर्बाध बिजली आपूर्ति करबाक, कार्यक्रम स्थल पर आवश्यक जगह पर ऊंचाईमे तार आ पोल लगेबाक, स्वास्थ्य विभागक अधिकारीकेँ राज्यपाल लेल बनए वला खाद्य पदार्थक जांच करबाक आर भवन निर्माण विभागक अधिकारीकेँ अपन उपस्थितिमे मंच, पंडाल, द्वार बनेबाक निर्देश देलैन्ह। एहि अवसर पर केंद्रक कृषि वैज्ञानिक प्रमोद झा, ईश्वरचंद्र झा सङ्ग अन्य कर्मी सभ उपस्थित छलैथ।
