आरबीआई लगातार छठम बेर रेपो दर ६.५% पर रखलक अपरिवर्तित

नई दिल्ली
*

भारतीय रिजर्व बैंकक मौद्रिक नीति समिति मंगलदिन मुम्बईमे शुरू भेल तीन दिवसीय बैसारक बाद ८ फरवरीकेँ रेपो दरपर अपन निर्णयक खुलासा कयलक। आरबीआई गवर्नर शक्तिकान्त दास बृहस्पति भोर १० बजे एमपीसीक निर्णयक घोषणा कयलनि। आरबीआई एमपीसी फरवरी २०२४ धरि लगातार छठम बेर रेपो दर ६.५ प्रतिशतपर कायम रखलक अछि। बेंचमार्क ब्याज दर अन्तिम बेर फरवरी २०२३मे बढ़ाओल गेल छल, ओहि समय एकरा ६.२५ प्रतिशतसँ बढ़ाकऽ वर्तमान ६.५ प्रतिशत कऽ देल गेल छल। एहिसँ पहिने ई मई २०२२ सँ फरवरी २०२३ धरि रेपो दरमे २५० आधार अंकक वृद्धि केने छल।

आरबीआई गवर्नर शक्तिकांत दास आरबीआईक मौद्रिक नीति समिति (एमपीसी)क बैसारक बाद अपन संबोधनमे कहलनि जे वैश्विक आर्थिक परिदृश्यसँ मिश्रित संकेत भेटि रहल अछि। अस्थिर वैश्विक स्थितिक बीच भारतीय अर्थव्यवस्था नीक प्रदर्शन कयलक अछि। महंगाई कम होइत देखाइत अछि। ओ कहलनि जे एहि बैसारमे विस्तृत विचार-विमर्शक बाद एमपीसी रेपो दर ६.५% पर स्थिर रखबाक निर्णय लेलक अछि। छओ मे सँ पाँच सदस्य एकर समर्थनमे छलाह।

एमपीसी बैसारक बाद आरबीआई गवर्नरक घोषणाक मुख्य बिन्दु –
२०२४ मे महंगाई दरमे कमी आबय केर उम्मीद अछि।
खाद्य पदार्थक दाममे कमीक कारण महंगाई पर प्रभाव।
वित्त वर्ष २०२५ मे सेहो विकास दर बरकरार रहत।
ब्याज दरमे कोनो बदलाव नहिं भेल अछि।
रेपो दर ६.५% पर अपरिवर्तित राखल गेल अछि।
वित्त वर्ष २०२५ केर लेल मुद्रास्फीति ४.५% रहत।
वित्त वर्ष २०२४ मे महंगाई पूर्वानुमान ५.४% पर बनल रहल।
रुपयामे स्थिरता, भारतीय अर्थव्यवस्थामे मजबूतीक संकेत।
वित्त वर्ष २०२५ मे जीडीपी वृद्धि ७% अनुमानित
मौद्रिक नीति समिति (एमपीसी) मुद्रास्फीतिकेँ नियंत्रित करबाक आ विकासकेँ बढ़ावा देबाक लेल उदार रुख केर वापिस लेबाक अपन रुख बरकरार रखलक अछि : गवर्नर दास
वृद्धि दर तेज भऽ रहल अछि, जे अधिकांश विश्लेषकक अपेक्षासँ बेसी अछि : आरबीआई गवर्नर दास
एमएसएफ (सीमांत स्थायी सुविधा दर) आ बैंक दर ६.७५ प्रतिशत पर अपरिवर्तित अछि।
खाद्य पदार्थक दाममे अनिश्चितताक प्रभाव मुख्य मुद्रास्फीति पर पड़ि रहल अछि : आरबीआई गवर्नर दास
२०२४ मे वैश्विक वृद्धि दर स्थिर रहबाक अनुमान : गवर्नर दास
एमपीसी मुद्रास्फीति केर ४% लक्ष्य पर रखबाक लेल प्रतिबद्ध : आरबीआई गवर्नर
२०२४-२५ मे आर्थिक गतिविधि जारी रहबाक उम्मीद : दास
अंतरिम बजटक अनुसार सरकार राजकोषीय मजबूत केर बाट पर : आरबीआई गवर्नर
ग्रामीण माँग लगातार बढ़ि रहल अछि, शहरी उपभोग मजबूत बनल अछि: आरबीआई गवर्नर
नीतिगत दरमे बदलावक पूरा प्रभाव एखन धरि ऋण बाजारमे नहि पहुंचल अछि : गवर्नर दास
बढ़ैत भू-राजनीतिक तनाव आपूर्ति श्रृंखलाकेँ प्रभावित कऽ रहल अछि आ वस्तुक दाम, विशेष रूपसँ कच्चा तेलपर दबाव पड़ि रहल अछि : आरबीआई गवर्नर दास
हम अपेक्षा करैत छी जे विनियमनक दायरामे आबयवाला इकाइसभ अनुपालनक प्रकृति, उपभोक्ता हितक संरक्षणकेँ सर्वोच्च प्राथमिकता देत : दास
वित्त वर्ष २०२३-२४क अक्टूबर-दिसंबर तिमाहीमे भारतक सेवा निर्यात मजबूत रहल: आरबीआई गवर्नर दास
भारतक विदेशी मुद्रा भंडार ६२२.५ अरब डॉलर पर सब विदेशी प्रतिबद्धता केर पूरा करबा लेल पर्याप्त : दास
भारतीय रुपयामे वित्त वर्ष २०२३-२४मे सबसँ कम उतार-चढ़ाव देखल गेल। विनिमय दर काफी स्थिर अछि : आरबीआई गवर्नर दास
भारतीय अर्थव्यवस्था मजबूत, निरंतर वृद्धि पथ पर आत्मविश्वाससँ भरल प्रगति कए रहल अछि : आरबीआई गवर्नर दास

एमपीसीक बैसारक बाद संवाददाता सभसँ बातचीत करैत आरबीआई गवर्नर शक्तिकान्त दास कहलनि जे हम सभकेँ आश्वस्त करय चाहैत छी, भारतक वित्तीय क्षेत्र बहुत मजबूत अछि। बैंक आ एनबीएफसीक प्रदर्शन आ आंकड़ा मजबूत अछि। वित्तीय संस्थानक विकास दरमे मोमेंटम अछि। हम एकटा नियामकक रूपमे अपन काज जारी रखैत छी। ई हमर प्रयास अछि जे हम वित्तीय संस्थानक सङ्ग सीधा संवादमे रहू। हम हुनका सभकेँ कहैत छी जे कतए चूक अछि, कतए दिशानिर्देशक पालन नहिं कयल गेल अछि। हम हुनका सभसँ समय देबाक लेल आ त्रुटि सभकेँ ठीक करबाक लेल कहैत छी। जतय समय पर डेग नहिं उठाओल जाइत अछि, ओतय हमरासभकेँ आम जनता, ग्राहक आ जमाकर्ताक हितमे आ वित्तीय संस्थानक हितमे डेग उठाबय पड़ैत अछि।