नीतीश कुमार पर बनल शॉर्ट फिल्म ‘मेरा नाता मेरा अभिमान लॉन्च, निशांत कहलनि हम एकरा आगू बढ़ायब

पटना । समदिया

निशांत कुमार बृहस्पतिकेँ पार्टी दफ्तर पहुँचल छलाह। नीतीश कुमार पर एकटा शॉर्ट फिल्म बनल अछि, जाहिमे देखाओल गेल जे 20 सालमे नीतीश कुमार की-की काज कयलन्हि।

नीतीश कुमारक पुत्र निशांत जेडीयू दफ्तरमे बृहस्पतिकेँ अपन पिता पर बनल शॉर्ट फिल्म ‘मेरा नेता, मेरा अभिमान’ केर लॉन्चिंग कयलन्हि। एहि शॉर्ट फिल्ममे नीतीश कुमार 20 सालमे जतेक काज कयलन्हि, से देखाओल गेल अछि। नीतीश कुमार पर बनल एकटा गाना सेहो रिलीज कयल गेल।

कार्यक्रमक दौरान अशोक चौधरी सेहो उपस्थित छलाह। ओ भावुक भऽ कानय लगलाह। निशांत हुनक कंधा पर हाथ रखिकय हुनका ढांढ़स बंधेलन्हि। एहि अवसर पर निशांत कुमार दू-चारि पाँतिमे अपन बात रखलन्हि। सरकारमे ओ शामिल नहि भेलाह तऽ आब आगूक हुनक योजना की अछि, सेहो स्पष्ट कयलन्हि।

फिल्म देखलाक बाद निशांत कहलनि, “…ई देखबैत अछि जे 20 सालमे पिता जी कतेक काज कयलन्हि। चाहे शिक्षा होए, स्वास्थ्य सेवा होए, रोजगार देनाय होए, महिला सशक्तिकरण होए वा आर किछु, अल्पसंख्यक, पिछड़ल सभक लेल काज कएलनि अछि। हमर प्रयास रहत 20 सालमे ओ जे कयलनि अछि ओकरा जनता तक लऽ जयबाक प्रयास करब। पिताक अधूरा सपना पूरा करब। हमर प्राथमिकता जदयू आ संगठनकेँ मजबूत करब रहत। जनताक आशीर्वाद लेब।”

दोसर दिसि एहि अवसर पर निशांत पार्टी कार्यालयमे नेता आ कार्यकर्ता सभसँ भेंट कयलनि आ सबहक गप्प सुनलथि। ओ एक्स पर पोस्ट कयलनि, “आइ (बृहस्पति) हम राज्य कार्यालय पटनामे प्रदेश भरिसँ जदयू विधायक, एमएलसी, नेता आ पार्टी कार्यकर्तासँ शिष्टाचार भेंट कयलहुँ। एहि अवसर पर उपस्थित समस्त सहयोगी लोकनि हमर पिताक काज आ जनसेवा सम्बन्धी हुनक अनुभव सभकेँ मोन पाड़ैत अपन उद्गार व्यक्त कयलनि।”

आगू कहलनि, “हम सभ सहकर्मीसभसँ आग्रह कएलौँह जे संस्थाकेँ मजगूत आ प्रभावकारी बनेबाक लेल एकजुट आ समर्पित रूपसँ काज करथि। हम सभ संस्थाकेँ नव उचाई पर ल’ जेबाक लेल पूर्ण लगनशीलता, लगन आ प्रतिबद्धताक संग काज करबाक लेल प्रतिबद्ध छी।”