चिराग पासवान रविदिन वैशाली लोकसभा क्षेत्रक साहेबगंजमे जन आशीर्वाद महासभाकेँ सम्बोधित कयलनि। एहि जनसभाक बारेमे चर्चा भेल जे एहि दौरान चिराग पासवान अपन गठबंधन आ वैशाली लोकसभा सीटक उम्मीदवारक घोषणा कऽ सकैत छथि, मुदा चिराग पासवान सीधा कहलनि जे हुनकर गठबंधन मात्र बिहारक जनताक संग अछि, संगहि ओ इहो दावा कयलनि जे लोजपा वैशाली लोकसभा सीट पर चुनाव लड़त।
चिराग पासवन कहलनि जे हमर गठबंधन मात्र बिहारक जनताक संग अछि। कतेको लोक हमर राज्य केर लूटि लेलक। आइयो हमर युवा रोजगार लेल आन राज्य जाइत छथि। आब चुनावक समय अछि। हमरा सही विकल्प चुनबाक अछि। बिहार फर्स्ट, बिहारी फर्स्टक लड़ाई जारी अछि। पिछला पांच सालमे जमुईमे सुधार भेल अछि। नीति आयोगक रिपोर्टमे इ साबित भऽ गेल अछि। बिहार फर्स्ट बिहारी फर्स्टक अन्तर्गत बिहारकेँ सेहो नम्बर १ बनयबाक अछि। बिहारकेँ युवाक राज्य कहल जाइत अछि। जँ बिहारक हर युवा एक बनि जाएत तऽ बिहार नंबर एक होएत। चिराग पासवान महिलासभसँ आग्रह कयलनि जे बिहारक युवाकेँ रोजगारक लेल बाहर नहिं जाइथ।
ओ कहलनि जे बिहारक हर युवाकेँ चिराग पासवान बनबाक अछि। एकरा लेल महिलाक समर्थनक आवश्यकता अछि। चिराग पासवान कहलनि जे चिराग पासवान केकरो सामने नहिं झुकैत अछि। चिराग पासवानकेँ तोड़बाक लेल कतेको लोक काज कयलनि। परिवारकेँ तोड़ि देलक, पार्टी सेहो तोड़ि देलक। लेकिन, चिराग पासवान नहिं टूटल आ ने कहियो टूटत। माथ पर कफन बान्हि निकलल छी, जा धरि बिहार विकसित राज्य नहिं बनि जाइत अछि, हम नहिं रुकब। वैशाली लोकसभाक उम्मीदवार अहांक सभ समस्याक समाधान करत।
रैली केर बाद संवाददाता सबसँ बातचीतमे चिराग पासवान कहलखिन कि हुनकर गठबंधन बिहारक जनताक संग अछि। राजद केर संग गठबंधनक सवाल पर चिराग पासवान कहलनि कि हम ओ नहि छी जे बेर-बेर गठबंधन बदलैत अछि। बहुत जल्दिये सीट पर सब किछु साफ भए जाएत।
रैलीक दौरान मंच पर वैशाली सांसद वीणा देवी, विनीता विजय आ संजय सिंह तीनू टिकट दावेदार सहित लोजपाक कतेको प्रमुख नेता उपस्थित छलाह। वीणा देवी चिराग पासवानकेँ सोनाक मुकूट पहिरा स्वागत कयलनि, संगहि संग संजय सिंह चांदीक मुकूट पहिरेलनि। चिरागक एहि रैलीमे काफी भीड़ छल।
