२०२४क लोकसभा चुनावसँ पहिने बहुत रास उलट-फेर देखल जा सकैत अछि। चुनावसँ पहिने कतेको नेता अपन पक्ष बदलैत देखल जा रहल छथि। एम्हर चर्चा जोर-शोरसँ चलि रहल अछि जे विकासशील इंसान पार्टी (वीआईपी) केर मुकेश सहनी सेहो एनडीए मे शामिल भऽ सकैत छथि। सूत्रक अनुसार मुकेश सहनीकेँ एनडीएसँ विशेष प्रस्ताव देल गेल अछि। रविदिन मुकेश सहनी दिल्ली पहुंचलाह, जतय ओ भाजपाक राष्ट्रीय अध्यक्ष जेपी नड्डासँ भेंट छलनि। ओतहि मुकेश सहनी काल्हि साँझ दिल्लीसँ पटना घुरि अयलाह। जानकारीक अनुसार जेपी नड्डा आ मुकेश सहनीक बीच एनडीएमे शामिल होयबाक लेल अन्तिम चरणक वार्ता होयत जे सहनीकेँ भाजपाक ऑफर स्वीकार अछि वा नहिं।
मुकेश सहनीकेँ बिहारमे एमएलसी आ मंत्री पदक प्रस्ताव देल गेल अछि। संगहि लोकसभामे सीट देल जा सकैत अछि वा नहिं, एहि पर एखन धरि कोनो जानकारी नहिं भेटल अछि।
जानकारीक अनुसार मुकेश सहनी लेल एनडीए आ महागठबंधन दुनूक दरवाजा खुजल अछि। ज्ञातव्य जे २०१९ केर लोकसभा चुनावमे वीआईपी महागठबंधनक संग 3 सीट पर चुनाव लड़ल। मुदा, वीआईपीकेँ तीनू सीटपर हारक सामना करय पड़ल। २०१९क लोकसभा चुनावमे एनडीए बिहारक ४० लोकसभा सीटमेसँ ३९ सीट जीतलक, जखन कि राजद एकटा सीट जितलक।
