प्रधानमंत्री नरेन्द्र मोदी शनिदिन भाजपाक राष्ट्रीय पदाधिकारी सभकेँ सम्बोधित करैत पार्टी कार्यकर्तासभसँ आगामी लोकसभा चुनाव जीतबाक लेल अगिला १०० दिन धरि कठिन परिश्रम करबाक आह्वान कयलनि।
ओ कहलनि जे आगामी लोकसभा चुनावमे भाजपा आ एनडीए केर ४०० सीट पार करय लेल ३७० सीट जीतबाक लक्ष्य मात्र संख्या नहिं अछि, बल्कि ३७० सीट जीतलासँ भाजपाक हर कार्यकर्ता डॉ. श्यामा प्रसाद मुखर्जीक बलिदानकेँ श्रद्धांजलि देत।
प्रधानमंत्री मोदीक भाषणक विषयमे मीडियाकेँ सम्बोधित करैत भाजपाक राष्ट्रीय महासचिव विनोद तावड़े कहलनि जे प्रधानमंत्री मोदी बैसारमे कहलनि जे एहि चुनावमे विपक्ष ‘तू तू मैं मैं’क राजनीति करत। लेकिन, पार्टी कार्यकर्ताकेँ जनताकेँ सरकारक काज आ उपलब्धिक बारेमे बताबय पड़त।
ओ कहलनि जे बैसारमे प्रधानमंत्री मोदी सभ सीटक लेल पार्टीक उम्मीदवारक घोषणा कयलनि आ कहलनि जे भाजपाक एकमात्र उम्मीदवार अछि, कमलक फूल, आ सभकेँ मिलि एकरे विजयी बनेबाक अछि।
तावड़े कहलनि २५ फरवरीसँ देशभरिमे लाभार्थी संपर्क अभियान शुरू कयल जायत, हर बूथ पर ३७० वोट ज्यादा हासिल करय केर योजना पर काज कयल जायत। आइ बैसारमे ‘विकसित भारत मोदी गारंटी’, ‘फिर एक बार मोदी सरकार’ प्रस्ताव प्रस्तुत कयल जायत।
