बिहारक मुख्यमंत्री नीतीश कुमार शनिदिन कहलनि जे पार्टी लोकसभा चुनावमे नीक प्रदर्शन करत, आ पछिला बेरक तुलनामे बेसी सीट जीतत। पटनामे पूर्व मुख्यमंत्री कर्पूरी ठाकुरक पुण्यतिथि पर आयोजित कार्यक्रममे भाग लेलाक बाद संवाददाता सभसँ बातचीत करैत नीतीश कुमार कहलनि जे हम ठाकुर जी के जयंती आ पुण्यतिथि पर कार्यक्रम आयोजित करैत आबि रहल छी आ हम सब सदैव एहिमे शामिल होइत रहल छी।
ओ कहलनि जे जननायक कर्पूरी ठाकुरजी अपन समयमे पिछड़ा आ वंचितक लेल बहुत काज कयलनि। आरक्षणक दायरा बढ़ल। ओ शराबबंदी लागू कयलनि, मुदा पदसँ हटलाक बाद निषेध हटा लेल गेल। जननायक कर्पूरी ठाकुर जीक आदर्शक पालन करयवला हम सभ छी। जननायक कर्पूरी ठाकुर जीकेँ भारत रत्नक मांग हम सब बहुत दिनसँ करैत आबि रहल छलहुं। ई प्रसन्नताक विषय अछि जे केन्द्र सरकार हुनका भारत रत्नसँ सम्मानित कयलक अछि।
‘इंडिया’ गठबंधनक विषयमे पूछल गेल प्रश्नक उत्तरमे मुख्यमंत्री कहलनि, “हमसभ अलग भऽ गेल छी, आन दल की कऽ रहल अछि, हम नहिं जनैत छी।” हम विपक्षी दलकेँ एकजुट करबाक कोशिश कयलहुं, मुदा कोनो फायदा नहिं भेल। आब हुनका सभसँ अलग भए गेल छी। हम सभ एहि गठबंधनक लेल एकटा अलग नाम सुझाओने छलहुँ, मुदा ओ लोकनि अपन दिससँ एकर नाम रखलनि।”
ओ कहलखिन जे ओ सभ की करैत छथि, वैऽह जानौथ। कांग्रेस नेता राहुल गांधीक विरोधमे बयान देबा पर नीतीश कहलनि कि हुनका जे कहय केर अछि से कहौथ, हमरा हुनकासँ कोनो लेना-देना नहिं अछि। मीडियामे बनल रहबाक लेल ओ किछो बजैत छथि। हम बिहारमे जाति आधारित जनगणना करबेलौंह, एकर चर्चा नहिं करैत छथि। ओ सभ हमर काजक बारेमे किछु नहिं कहैत छथि।
महागठबंधन सरकारक किछु मंत्रीक विभागक विरुद्ध जाञ्चक आदेश देबाक संबंधमे पत्रकारक प्रश्नपर मुख्यमंत्री कहलनि, “हमसभ काजक समीक्षा करैत छी। जँ कोनो गड़बड़ी होयत तऽ तकर जाँच कयल जायत। हम केकरो गड़बड़ नहिं करए देब। कैबिनेट विस्तारक बारेमे संवाददाता द्वारा पूछल गेल सवाल पर मुख्यमंत्री कहलनि कि, एखनि हमरा संग आर आठ टा मंत्री काज कय रहल छथि। सभ काज भऽ रहल अछि, मंत्रीमंडल विस्तार समय पर भऽ जायत।
