प्रवर्तन निदेशालय रांचीमे भूमि घोटालाक मामिलामे झारखंडक मुख्यमंत्री हेमंत सोरेनकेँ सातम बेर तलब केलक अछि। एजेंसी एकरा अंतिम सम्मन बतौलक आ हुनका सात दिनक भीतर अपन बयान दर्ज करय लेल कहलक।
मुख्यमंत्रीकेँ पठाओल गेल पत्रमे ईडी हुनका दू दिनक भीतर एकटा एहन स्थान तय कऽ सूचित करबाक लेल कहलक अछि जतय हुनकर बयान दर्ज कयल जा सकय। ई स्थान दुनू पक्षक लेल उपयुक्त होयबाक चाही। एहिसँ पहिने ईडी द्वारा छह बेर सम्मन जारी कयल गेल छल आ हुनका रांची स्थित एजेन्सीक जोनल कार्यालयमे उपस्थित होयबाक लेल कहल गेल छल। हुनका पहिल बेर १४ अगस्त २०२३ केँ पूछताछ लेल समन पठाओल गेल छल। तकर बाद २४ अगस्त, ९ सितंबर, २३ सितंबर, ४ अक्टूबर आ १२ दिसम्बरकेँ उपस्थित होयबाक लेल समन पठाओल गेल। मुख्यमंत्री एहि मे सँ कोनो समन पर उपस्थित नहिं भेलाह।
ओ प्रत्येक बेर ईडीकेँ लिखित उत्तर पठौलनि आ समनकेँ अनुचित कहलनि। सोरेन ईडीक समनक विरुद्ध उच्च न्यायालय आ सर्वोच्च न्यायालयमे याचिका सेहो दायर कयलनि, मुदा हुनका बेसी राहत नहि भेटलनि।
उल्लेखनीय अछि जे ईडी रांचीक बड़गाई अंचलक जमीनसँ जुड़ल सरकारी दस्तावेजमे छेड़छाड़ आ जालसाजीक मामिलाक जांचक संबंधमे ईडी सीए हेमंत सोरेनक बयान दर्ज करय चाहैत अछि।
एजेंसी द्वारा सोरेनकेँ पठाओल गेल पत्रमे कहल गेल अछि जे अहाँकेँ छओ बेर सम्मन पठाओल गेल छल, मुदा अहाँ एक्को बेर ईडी कार्यालयमे उपस्थित नहिं भेलहुँ। अहां एकरा लेल आधारहीन कारण देलहुं। समनक आलोकमे अहाँक उपस्थित नहिं भेलासँ मामिलाक जाञ्चमे बाधा आबि रहल अछि। संगहि, जाँच प्रभावित भS रहल अछि। यदि सातम आ अंतिम समनक बाद बयान दर्ज नहिं कयल जाइत अछि तँ एहि मामिलामे उचित कार्रवाई कयल जायत।
