ईडी सोमदिन भोरे मुख्यमंत्री हेमंत सोरेनकेँ दिल्ली स्थित आवास आ झारखंड भवन पर छापा मारलक अछि। सोरेन एखन दिल्लीमे छथि। ओ २७ जनवरीकेँ राति लगभग ८ बजे चार्टर्ड विमानसँ राँचीसँ दिल्ली गेलाह। कहल जाइत अछि जे ओ ओतय ईडीक कार्रवाईक संबंधमे अपन वकील आ कानूनी विशेषज्ञसभक सङ्ग कानूनी परामर्श कयलनि।
ईडीक एहि दस्तकक खबरक संग रांचीमे सरकार आ प्रशासन अलर्ट मोडमे अछि। मुख्यमंत्री निवासक बाहर सुरक्षा कड़ा कऽ देल गेल अछि। सत्तारूढ़ गठबंधनक हिस्सा कांग्रेस अपन सभ विधायककेँ रांची पहुँचबाक लेल कहलक अछि।
राज्यक मुख्य सचिव एल खियांग्ते अधिकारीसभक आपातकालीन बैठक बजौने छथि। रांचीक एसएसपी सेहो सभटा थानेदार सभकेँ तलब कयलनि।
२५ जनवरीकेँ ईडी सोरेनकेँ दसम बेर समन पठौलक आ पूछलक जे ओ २९ या ३१ जनवरीक बीच पूछताछ लेल कहिया उपलब्ध रहताह। एजेंसी सोरेनकेँ इहो कहलक जे जँ ओ सम्मन पर उपस्थित नहिं होइत छथि तँ हुनक टीम स्वयं हुनका लग पहुँचत।
रांचीक बड़गाईं जोनमे लगभग ८.४६ एकड़ जमीनक खरीद आ बिक्रीमे मनी लॉन्ड्रिंगसँ जुड़ल मामिलामे ईडी सोरेनसँ २० जनवरीकेँ हुनकर निवास पर लगभग सात घंटा तक पूछताछ केलक। एजेंसी एहि मामिलामे कतेको आओर बिन्दु पर आगू पूछताछ करय चाहैत अछि।
ईडी बड़गाईं क्षेत्रक भूमि घोटालामे आईएएस छवि रंजन सहित डेढ़ दर्जन लोककेँ पहिनेसँ गिरफ्तार कऽ चुकल अछि। एहि मामिलामे ईडी सोरेनकेँ पहिल सम्मन पठौलक जाहिमे हुनका १४ अगस्त, २०२३ केँ उपस्थित होयबाक लेल कहल गेल छल। सोरेन एकर लिखित उत्तर देलनि आ सम्मन अवैध कहैत उपस्थित नहिं भेलाह।
एकर बादो एजेंसी हुनका सम्मन करैत रहल। सोरेन ईडीक सम्मनक विरुद्ध सर्वोच्च न्यायालय आ उच्च न्यायालयमे सेहो गेलाह, मुदा हुनका राहत नहिं भेटलनि।
अंततः ईडीक आठम सम्मन पर ओ २० जनवरीकेँ पूछताछ लेल उपलब्ध रहबाक लेल सहमत भेलाह आ तखन एजेन्सीक टीम हुनक निवास पर पहुँचि पूछताछ कयलक।
फिलहाल एखनि राजधानी रांचीमे मुख्यमंत्रीक आवास सहित कतेको आन जगह पर सुरक्षा व्यवस्था बढ़ा देल गेल अछि। एहि क्षेत्रमे अतिरिक्त पुलिस बल तैनात कयल गेल अछि।
