एन.डी.आई.ए. केर मुम्बईमे शक्ति प्रदर्शन, कहलनि राहुल गांधी – देशमे जानिबूझि कऽ पसारल जा रहल अछि द्वेष

मुंबई
*

कांग्रेस नेता राहुल गांधी मुम्बईक शिवाजी पार्कमे विपक्षी गठबन्धन इंडियाक रैलीकेँ सम्बोधित करैत कहलनि जे देशमे जानिबूझि कऽ घृणा पसारल जा रहल अछि। रविदिन राहुलक भारत जोड़ो न्याय यात्राक समापन रैली मुंबईक ऐतिहासिक शिवाजी पार्कमे इंडियाक शक्ति प्रदर्शनक माध्यम बनल। एहिमे देशक कतेको भागसँ कतेको वरिष्ठ विपक्षी नेता भाग लेलनि।
कांग्रेस नेता राहुल गांधी मुम्बईक शिवाजी पार्कमे विपक्षी गठबन्धन इंडियाक रैलीकेँ सम्बोधित करैत कहलनि जे देशमे जानिबूझि कऽ द्वेष पसारल जा रहल अछि। हुनकर भारत जोड़ो यात्रासँ जे संदेश निकलल अछि ओ ई अछि जे द्वेष पसरय नहिं दियौक, बल्कि नफरतक बजारमे मुहब्बतक दोकान खोलू।

एहिमे महाराष्ट्रक महा विकास अघाड़ीक नेता उद्धव ठाकरे आ शरद पवारक अतिरिक्त देशक दोसर हिस्सासँ आयल विपक्षक कतेको पैघ नेता भाग लेलनि।एहि शक्ति-प्रदर्शनमे बिहारक पूर्व उपमुख्यमंत्री तेजस्वी यादव, नेशनल कॉन्फ्रेंसक नेता फारूक अब्दुल्ला, पीडीपी नेता महबूबा मुफ्ती, झारखण्डक मुख्यमंत्री चम्पई सोरेन, झारखंड मुक्ति मोर्चाक नेता कल्पना सोरेन, तमिलनाडुक मुख्यमंत्री एमके स्टालिन, आम आदमी पार्टीक नेता सौरभ भारद्वाज, महाराष्ट्रक वंचित बहुजन अघाड़ीक नेता प्रकाश अम्बेडकर सहित अन्य शामिल छलाह। रैलीमे कांग्रेस महासचिव प्रियंका वाड्रा आ कांग्रेस अध्यक्ष मल्लिकार्जुन खड़गे सेहो उपस्थित छलाह।

रैलीकेँ सम्बोधित करैत राहुल केन्द्र सरकारपर चीनक सङ्ग प्रतिस्पर्धा करयवला लघु उद्योगसभकेँ नष्ट करबाक आरोप लगओलनि। ओ कहलनि जे नोटबंदी आ जीएसटीक कारण देशमे रोजगारक अवसर खतम भऽ गेल अछि। सरकार छोट उद्यमी आ व्यवसायीकेँ समाप्त करय चाहैत अछि। ओ लोकसभसँ आह्वान कयलनि जे अहाँकेँ एहि सबहक विरुद्ध ठाढ़ होयबाक चाही। किएकि अहीं भारत माता छी।

राहुल विशेष रूपसँ युवासभकेँ आह्वान करैत कहलनि जे हमरासभक दायित्व अछि, मुदा देशक युवाक सेहो जिम्मेदारी अछि।हुनका सभकेँ ठाढ़ होबए पड़त। रैलीकेँ सम्बोधित करैत एनसीपीक अध्यक्ष शरद पवार कहलनि जे आइ देशक स्थिति बदलब आवश्यक अछि। जिनका हाथमे सत्ता अछि ओ अपन वचन पूरा नहिं कयलनि। तेँ आब चुनावमे मतदान कए हुनका सबकेँ हटाबय केर जरूरत अछि। प्रकाश अम्बेडकर कहलनि जे हम सभ मिलि कऽ लड़ी, वा असगर लड़ी मुदा एहि सरकारसँ लड़बाक आवश्यकता अछि।

बिहारक पूर्व उपमुख्यमंत्री तेजस्वी यादव भारत जोड़ो यात्रा निकालबाक लेल राहुल गाँधीकेँ धन्यवाद दैत कहलनि जे महाराष्ट्रमे मात्र किछु विधायक टूटल छथि। बिहारमे हमर काका (नीतीश कुमारक प्रति इशारा) केँ अपहरण कए लेल गेल। मोदीजी ई गारंटी दऽ कऽ देखाबैथ कि हमर काका फेर नहिं पलटताह। ओ कहलनि “हमर लड़ाई नफरतक विचारधाराक विरुद्ध अछि, व्यक्तिगत रूपसँ नरेन्द्र मोदी वा अमित शाहक विरुद्ध नहिं।
भाजपा अपन योजना मे सफल नहि भऽ सकत।”
झारखण्डक पूर्व मुख्यमंत्री हेमंत सोरेनक पत्नी कल्पना सोरेन कहलनि जे हमर पतिकेँ एकटा षड्यंत्रक तहत जेलमे डालि देल गेल अछि। जम्मू-कश्मीरक पूर्व मुख्यमंत्री फारूक अब्दुल्ला कहलनि जे हमरासभकेँ भारतक सभ लोककेँ सुरक्षित रखबाक अछि, चाहे ओ कोनो धर्मक होइथ। पीडीपी अध्यक्ष महबूबा मुफ्ती कहलनि जे भाजपा संविधान बदलबाक लेल ४०० सँ बेसी लोकसभा सीट जीतबाक बात करैत अछि, मुदा ओ अपन योजनामे सफल नहिं होयत।