शुक्रदिन हाथरसमे रामकथाक क्रममे अचानक बीमार पड़लाक बाद तुलसी पीठाधीश्वर जगद्गुरु रामभद्राचार्यकेँ हेलीकॉप्टरसँ देहरादूनक सिनर्जी अस्पताल पहुँचाओल गेल।
शुक्रदिन जखन ओ हाथरसमे रामकथा कऽ रहल छलाह तखन अचानक हुनका सांस लेबामे दिक्कत भेलनि। एकर बाद हुनका हेलीकॉप्टरसँ लऽ कऽ देहरादूनक सिनर्जी अस्पतालमे भर्ती कयल गेल, जतय चिकित्सकलोकनि हुनक जाँच कयलनि। पता चलल जे निमोनियाक कारण हुनका छातीमे कनेक संक्रमण अछि, मुदा ओ खतरासँ बाहर छथि आ एखन हुनक स्वास्थ्य ठीक अछि।
ज्ञातव्य जे शुक्रदिन कथाकेँ विश्राम देबाक छल। एम्हर ओ छाती दर्दक शिकायत केलनि। एकर बाद हुनक शिष्य दुपहरमे हुनका आगरा अनलनि आ पहिने हुनका आगराक पुष्पांजलि अस्पतालमे भर्ती कयल गेल।
अस्पतालक चिकित्सा अधिकारी, डा. राकेश शर्मा कहलनि जे छाती दर्दक शिकायत भेलाक बाद हुनका एतय आनल गेल छल। डा. नवनीत शर्मा हुनकर इलाज कए रहल छलाह। बादमे हुनका राति ९ बजे हवाई मार्गसँ देहरादून लऽ जायल गेल। प्रारंभिक जाँचमे हुनका सीनामे संक्रमण होयबाक पता चलल अछि। मुख्यमंत्री योगी आदित्यनाथ फोन पर हुनक हाल-समाचार जनलनि।
