लोकसभा चुनाव-२०२४ पहिले चरणसँ अपन चरम पर पहुँचि गेल अछि। भाजपा कांग्रेस आ गांधी परिवार पर निशाना साधैत अछि। ओतहि विपक्षी दल प्रधानमंत्री नरेन्द्र मोदी आ भाजपा पर निशाना साधि रहल अछि। एम्हर किछु विशेष सीटपर उम्मीदवारकेँ लऽ कऽ दलमे जबरदस्त मंथनक दौर चलि रहल अछि। एहिमे गांधी परिवारक पारम्परिक सीट अमेठी आ रायबरेली सम्मिलित अछि। २६ अप्रैलकेँ वायनाडमे चुनावक बाद राहुल अमेठी जयताह।
कांग्रेसक शीर्ष सूत्रक अनुसार, बहुत विचार-विमर्श आ सर्वेक्षणक बाद ई सहमति बनल अछि जे अमेठीसँ राहुल गाँधी आ रायबरेलीसँ प्रियंका गाँधीकेँ कांग्रेसक उम्मीदवार बनाओल जाय। एकर घोषणा जल्दिये पार्टी स्तर पर होबय जा रहल अछि। वास्तवमे पिछला चुनावमे अमेठीसँ राहुल गांधीक हार आ एहि बेर सोनिया गांधीक रायबरेलीसँ चुनाव नहिं लड़बाक कारण कांग्रेसकेँ विपक्षी दलक दुनू सीट पर उम्मीदवार चयनक लेल संघर्ष करय पड़ि रहल अछि। पछिला बेर भाजपा नेता स्मृति ईरानी अमेठीसँ राहुल गाँधीकेँ पराजित कयने छलीह। एहि पारम्परिक सीटसँ राहुल गाँधीक पराजयक कारण देशक नजरि एहि सीट पर अछि।
कहल जा रहल अछि जे कांग्रेस दुनू सीट पर आंतरिक सर्वेक्षण कयलक अछि, जकर सकारात्मक परिणाम भेटल अछि। मीडिया रिपोर्टक अनुसार अमेठीक स्थिति आब पछिला चुनाव जकाँ नहिं अछि। एतय आम लोक गांधी परिवारकेँ याद कऽ रहल छथि। ओना स्मृति ईरानी अमेठी आ वायनाडमे सेहो राहुल गाँधीपर हमला कऽ रहल छथि।
ओना, कांग्रेसक सूत्रक कहब अछि जे राहुल आ प्रियंकाकेँ दुनू सीट पर उच्चतम स्तर पर चुनाव लड़बाक निर्णय लेल गेल अछि आ तैयारी सेहो शुरू कऽ देल गेल अछि।
