बिहारमे दोसर चरणमे एहि सीट सभ पर रोमांचक टक्कर

दोसर चरणक प्रचार बृहस्पति साँझमे समाप्त भेल। १३ राज्यक ८९ सीटपर २६ अप्रैलकेँ होयत मतदान
*
पटना
*

बिहारमे पांच लोकसभा सीट पर २६ अप्रैलकेँ मतदान होएत। पांचो सीटक लेल प्रचार बृहस्पति साँझमे समाप्त भऽ गेल। दोसर चरणमे किशनगंज, पूर्णिया, बांका, भागलपुर आ कटिहारमे मतदान होएत। सभ दल एहि सभ सीटकेँ अपन पक्षमे बनेबाक लेल अपन ताकत लगा देलक अछि। एहि पाँच सीटमेसँ मिथिला सीमावर्ती क्षेत्र किशनगंज आ पूर्णियामे त्रिकोणीय मुकाबला देखल जा रहल अछि जखन कि अन्य तीन सीटपर एनडीए आ महागठबंधनक बीच सीधा मुकाबला अछि। एहि चरणमे जतय कांग्रेसक तीनटा उम्मीदवार महागठबंधनक तरफसँ चुनावी मैदानमे छथि, ओतहि राजदक दूटा उम्मीदवारक बीच कड़ा मुकाबला देखल जा रहल अछि।

राजगकेँ तरफसँ जेडीयू केर उम्मीदवार पांचो सीट पर चुनावी लड़ाईमे छथि। मुस्लिम बहुल किशनगंजमे मुकाबला रोचक अछि। एहि सीट पर कांग्रेसक वर्तमान सांसद मोहम्मद जावेद, जेडीयू केर मुजाहिद आलम आ एआईएमआईएम उम्मीदवार अख्तरुल ईमान के बीच अछि। एआईएमआईएम प्रमुख असदुद्दीन ओवैसी सेहो एतय आबि रैली कयलनि अछि। एहनमे एतय प्रतियोगिता त्रिकोणीय भऽ गेल अछि। ओना, ई मानल जाइत अछि जे एतय कियो आसानीसँ नहिं जीतय जा रहल छथि।

भागलपुरमे जेडीयूक अजय मण्डलक सीधा मुकाबला कांग्रेसक अजित शर्मासँ अछि। शर्मा अजय मंडलकेँ कड़ा मुकाबला दऽ रहल छथि मुदा एनडीए भागलपुरमे पूरा जोर दऽ रहल अछि। बांकामे जदयू केर गिरधारी यादवक मुकाबला राजदक जय प्रकाश यादवसँ अछि। २०१९क लोकसभा चुनावमे जयप्रकाश यादवकेँ जेडीयूक गिरधारी यादव पराजित कयलनि। जय प्रकाश एहि चुनावमे खूब पसीना बहा रहल छथि। एहि कारणेँ एतय काँटक टक्कर होयबाक आशंका अछि।

कटिहारमे जदयू केर दुलाल चंद गोस्वामी आ कांग्रेसक तारिक अनवर आमने-सामने छथि। दुलाल चन्द गोस्वामी पछिला चुनावमे एहि सीट पर जीत हासिल कयलनि। तारिक अनवर एहि सीटसँ पाँच बेर सांसद रहि चुकल छथि आ एहि चुनावमे ‘छक्का’ लगाबय लेल कठिन परिश्रम कय रहल छथि।

एहि चुनावक सबसँ हाॅट सीट पूर्णिया अछि। अईठाम टक्कर रोचक बनल अछि। पूर्णियामे जदयू केर संतोष कुशवाहा आ राजदक बीमा भारती आ निर्दलीय पप्पू यादवक बीच त्रिकोणीय मुकाबला अछि। पप्पू यादव निर्दलीय उम्मीदवारक रूपमे चुनाव लड़ि मुकाबला रोचक बना देलनि। मतदाता अपन प्रतिनिधि चुनबाक लेल २६ अप्रैलकेँ मतदान करत। मुदा ई निश्चित अछि जे दोसर चरणमे राजनीतिक लड़ाई रोचक अछि आ एहि चरणमे जदयू अध्यक्ष नीतीश कुमारक प्रतिष्ठा दांव पर लागल अछि।