सीएम सम्राटक स्त्रीगणकेँ पैघ उपहार, 22 हजार आंगनबाड़ी सेविका-सहायिकाक होयत बहाली
पटना । समदिया
मुख्यमंत्री सम्राट चौधरी केर अध्यक्षतामे भेल बिहार कैबिनेटक बैसारमे 22 हजार आंगनबाड़ी सेविका-सहायिकाकेँ बहाली केर मंजूरी देल गेल अछि। मुख्यमंत्री सम्राट चौधरी बड़का फैसला लेलाह।
स्त्रीगणकेँ लेल बुधदिन आयोजित कैबिनेटक बैसारमे बड़का प्रस्ताव पास भेल अछि। आंगनबाड़ीमे 22 हजार सेविका-सहायिका केर बहालीक निर्णय लेल गेल अछि।
केंद्र द्वारा प्रायोजित अमृत 2.0 मिशन केर तहत लखीसराय आ किशनगंज जलापूर्ति परियोजनाकेँ प्रशासनिक स्वीकृति देल गेल अछि। लखीसराय जलापूर्ति परियोजना – ₹150.96 करोड़ रुपया, किशनगंज जलापूर्ति परियोजना – ₹53.71 करोड़। ई परियोजनासभक माध्यमसँ लाखो परिवार सभकेँ स्वच्छ आ सुरक्षित पेयजल उपलब्ध होयत। संगहि शहरी आधारभूत संरचनाक नव मजबूती भेटत। मुख्यमंत्री कहलनि जे हमर सरकार हर घर तक गुणवत्तापूर्ण पेयजल पहुँचाबय आ विकसित बिहार केर संकल्पकेँ साकार करबाक लेल निरंतर काज क’ रहल अछि।
दरभंगाक रैयाम आ मधुबनीक सकरीमे जे बंद पड़ल चीनी मिलक परिसर अछि, ओहिमे नव सहकारी चीनी मिल आ कुसियार उपोत्पाद (By-products) आधारित उद्योग लेल स्वीकृत परियोजना देबाक निर्णय भेल अछि। एहि पहलसँ कुसियारक किसान सभक लेल बढ़ियाँ अवसरि भेटत, स्थानीय युवा सभक लेल रोजगार भेटत आ मिथिलाक औद्योगिक विकासकेँ नव ऊर्जा भेटत।
पथ निर्माण विभाग द्वारा जमुई जिला मे NH-333A पर दूटा उच्चस्तरीय आरसीसी पुल निर्माण परियोजनाक प्रशासनिक स्वीकृति देल गेल अछि। खैरा-सोनो पथक 72म किमी पर नरियाना घाट (क्यूल नदी) पर ₹93.82 करोड़क लागतसँ नव पुलक निर्माण। खैरा-सोनो पथक 80म किमी पर मंगोबंदर-सुकनर नदी पर ₹55.96 करोड़क लागत सँ नव पुलक निर्माण। एहि परियोजनासँ क्षेत्रीय संपर्क बढ़ियाँ होयत, आवाजाही सहज होयत आ स्थानीय व्यापार, कृषि आ आर्थिक गतिविधि सभ केँ नव गति भेटत। हमर सरकार आधुनिक आ मजबूत आधारभूत संरचनाक निर्माण लेल लगातार प्रतिबद्ध अछि।
बिहार राज्य केर सब्जी प्रसंस्करण आओर विपणन योजना केर अंतर्गत वेजफेड केर त्रि-स्तरीय सहकारी व्यवस्थाकेँ मजगूत करबा आ विस्तार करबा लेल ₹106.39 करोड़ केर योजना स्वीकृत भ’ चुकल अछि। प्रखंड स्तर पर आधारभूत संरचना बनाओल जायत, सहकारी समितिकेँ कार्यशील पूंजी आ रीफर वाहनक व्यवस्था सेहो विकसित कएल जायत।
