आ प्रशांत किशोरक सुनब आब विधानसभामे गर्जना, सदस्यक लेलनि शपथ, कहलथि—‘ई हमरा लेल बहुत पैघ जिम्मेदारी’
पटना । समदिया
जन सुराज पार्टीक संस्थापक प्रशांत किशोर सोमदिन बिहार विधानसभा मे बांकीपुरक विधायकक रूपमे शपथ लेलनि। विधानसभा अध्यक्ष प्रेम कुमार हुनका पद आ गोपनीयताक शपथ देलनि। एहि अवसर पर हुनकर समर्थक सभ सेहो पैघ संख्यामे उपस्थित छलाह।
शपथ ग्रहणक बाद मीडियाकर्मी सभसँ बातचीत करैत प्रशांत किशोर कहलनि जे, “जाहि सदनक सदस्य श्री बाबू, अनुग्रह नारायण सिंह, भारत रत्न कर्पूरी ठाकुर, नीतीश कुमार, लालू प्रसाद, रामविलास पासवान आ सुशील कुमार मोदी रहल छथि, ओहि सदनक सदस्यक रूपमे शपथ लेनाइ हमर लेल गौरवक बात अछि। ई हमरा लेल बहुत पैघ जिम्मेदारी अछि।”
समाज आ राज्यक बेहतरी लेल करब काज
प्रशांत किशोर कहलनि जे बिहारक समाज आ राज्यक विकास लेल अपन जीवनक बहुमूल्य वर्ष समर्पित करनिहार सैकड़ों विधायकक अनुभव आ मार्गसँ प्रेरणा लऽ कऽ ओ आगाँ काज करबाक प्रयास करताह।
ओ कहलनि जे हुनकर प्रयास रहतनि जे विधायकक रूपमे बिहारक समाजक बेहतरी, शिक्षा, रोजगार आ सामाजिक सुरक्षा सहित जनहितक मुद्दा पर प्रभावी काज कएल जाए।
बांकीपुर उपचुनावमे भेटल छल जीत
प्रशांत किशोर 3 अगस्तक बांकीपुर विधानसभा उपचुनावमे जीत दर्ज कऽ चुनावी राजनीतिमे अपन शुरुआत केलनि। ओ भाजपा उम्मीदवार नीरज कुमार केँ 19,324 वोटक अन्तरसँ पराजित केलनि। प्रशांत किशोर केँ 64,151 वोट भेटल छल, जखनकि नीरज कुमार केँ 44,827 वोट प्राप्त भेल।
ई उपचुनाव भाजपा अध्यक्ष नितिन नवीनक राज्यसभा लेल निर्वाचित भेलाक बाद बांकीपुर विधानसभा सीट खाली भेलासँ कराओल गेल छल।
दू वर्षमे 10 हजार युवाक रोजगारक वादा
विधायक बनलाक बाद प्रशांत किशोर बांकीपुर क्षेत्रक कम-सँ-कम 10 हजार युवाक दू वर्षक भीतर निजी क्षेत्रमे रोजगारक अवसर उपलब्ध करयबाक घोषणा कऽ चुकल छथि।
ओ कहलनि जे पढ़ल-लिखल मुदा बेरोजगार युवाक सीवी हुनकर कार्यालयमे जमा कराओल जा सकैत अछि। अपन देशव्यापी संपर्कक माध्यमसँ युवासभकेँ बिहार आ देशक अन्य भागमे रोजगार उपलब्ध करयबाक प्रयास करबाक बात सेहो ओ कहलनि।
प्रशांत किशोरक अनुसार, जन सुराजक सरकार बनलाक बाद बिहारक भीतर रोजगारक अवसर बढ़ेबाक प्रयास होयत, मुदा तत्काल युवासभकेँ राज्यक बाहर सेहो रोजगारक अवसर खोजबाक जरूरत अछि।
शिक्षा आ सामाजिक सुरक्षापर सेहो जोर
प्रशांत किशोर सरकारी विद्यालयमे शिक्षाक गुणवत्ता सुधारबाक बात कहलनि। हुनकर दावा अछि जे एक वर्षक भीतर सरकारी विद्यालयक शिक्षाक स्तरमे एहेन सुधार करबाक प्रयास होयत जाहिसँ अभिभावक अपन बच्चाक नामांकन सरकारी विद्यालयमे कराबय लेल आकर्षित होथि।
एकर अतिरिक्त जरूरतमंद परिवारकेँ खाद्यान्न आ सामाजिक सुरक्षा पेंशन उपलब्ध कराबय दिस सेहो काज करबाक प्रतिबद्धता ओ व्यक्त केलनि।
