तेजस्वीक ‘खेल’ वाला बयान पर चौधरीक पलटवार
*
पटना
*
बिहार मे एनडीए सरकार एक बेर फेर सत्तामे आबि गेल अछि। एहिसँ राज्यमे राजनीतिक हलचल तेज भऽ गेल अछि। जेडीयू महागठबंधन छोड़ि राजगमे शामिल भऽ गेल अछि। एम्हर बिहारक पूर्व उपमुख्यमंत्री तेजस्वी यादव खेल होबय केर बात कहि दलनि। जाहि पर जेडीयू सेहो प्रतिक्रिया दैत कहलक अछि जे ओ खेलबाक लेल तैयार अछि। नीतीश कुमार ९म बेर मुख्यमंत्रीक शपथ लेलनि आ सोमदिन पदभार ग्रहण करैत राज्यक नव शिक्षा मंत्री विजय कुमार चौधरी सेहो कार्यमे उपस्थित भेलाह। एहिसँ पहिने विजय चौधरी गठबन्धन सरकारमे वित्त मंत्री छलाह। विजय चौधरी तेजस्वी यादवक खेल वक्तव्यक जवाब दैत कहलनि जे जँ बहुमत सिद्ध करबे ‘खेल’ अछि तऽ ‘खेल’ होयत। सोमदिन विजय चौधरी अपन कार्यालय पहुँचलाह, जतय ओ कार्यभार सम्हारलनि।
ओतहि जखन विजय चौधरीसँ कार्यभार सम्हारलाक बाद तेजस्वी यादवक बयान पर पूछल गेल तऽ ओ कहलखिन जे कोनो खेल नहिं होएत आ जँ बहुमत साबिते करब खेल , तऽ खेलल जायत। ओ आगू कहलनि जे सच्चाई ई अछि जे हमरा लग बहुमत अछि आ जखन हुनका पूछल गेल जे राजद टूटबाक दावा कए रहल अछि तखन की ई टूटत ? एकर जवाब दैत विजय चौधरी कहलनि जे हर पार्टी ई प्रयास करैत अछि, मुदा लोकतंत्रमे अंतमे गणितक सत्य होइत अछि। हमर सरकार लग बहुमत अछि आ सब एकरा जनैत छथि। बिहार जनैत अछि।
शिक्षा मंत्रीक संग जल संसाधन विभागक जिम्मेदारी सेहो विजय चौधरीकेँ देल गेल अछि। विभागक बारेमे पूछला पर ओ कहलखिन जे एहि विभागमे जे काज होएत, सब काज होएत आ पहिने सेहो काज भऽ चुकल अछि। विभाग विशेष रूपसँ बाढ़िक समय सतर्क रहत आ एहि बातक सेहो ध्यान राखल जायत जे कोनो जान-मालक क्षति नहिं होय। कार्यक्रम पहिने सेहो बनाओल जा चुकल अछि आ आगाँ सेहो बनाओल जा रहल अछि। संगहि आगाँ जे काज होयत, ओ अहां लोकनिकेँ देखाइ देत।
