गुवाहाटी गणेशगुड़ीमे लागल आगि

गुवाहाटी समदिया
*

गुवाहाटी असम विधानसभा लग गणेशगुड़ीमे शुक्र कऽ साँझमे करीब पाँच बजे सेंचुरी प्लाजा भवनमे भयंकर आगि लागि गेल। आगि लगिते देरि अफरा-तफरी मचि गेल। स्थानीय लोक सभ तत्काल दमकल विभागकेँ सूचना देलक। सूचना मिलैत देरी दमकल विभागक गाड़ी मौका पर पहुँच गेल आ आगि बुझाबय लागल। दमकल विभागक अधिकारी केर कहनाय छनि जे जुबिन गर्ग भोजनालय रेस्टोरेंटमे सिलेंडरक विस्फोटक कारण आगि लागि गेल। आगि किछुए कालमे पहिल मंजिल, दोसर मंजिल आ निचला मंजिल पर पसरि गेल। किछुए कालमे आगि कतेको प्रतिष्ठान केर घेरि लेलक जाहिमे जुबिन गर्ग भोजनायालय पूरा जरि कय राख भय गेल। एहि अगिलग्गीमे कतेको व्यावसायिक प्रतिष्ठान, शराबक दोकान, रेस्टोरेंट आ दवाईक दोकान सेहो जरि कए राख भय गेल। आगिमे बहुतो गाड़ी सेहो जरि गेल।
आगिक लौ बहुत ऊँच तक देखल गेल आ पूरा इलाका धुँआसँ भरि गेल। आगिसँ कतेको करोड़क संपत्तिक नोकसान होबए केर अनुमान अछि। एहि अगिलग्गीक कारण जीएस रोड पर भारी जाम लागि गेल। बादमे यातायात विभाग कतेको घंटा बाद यातायात केर सुचारू कय देलक।