वर्तमानमे बिहारमे मुख्यमंत्री नीतीश कुमार सहित नौ गोट मंत्री छथि। बिहारमे बहुत दिनसँ कैबिनेट विस्तार पर लागल ब्रेक हटि सकैत अछि। खबरि अछि जे जल्दिये नीतीश कुमारक नेतृत्वमे मंत्रिमंडलक विस्तार भऽ सकैत अछि। वर्तमानमे बिहारमे मुख्यमंत्री नीतीश कुमार सहित नौ गोट मंत्री छथि। एहिमे २टा सम्राट चौधरी आ विजय कुमार सिन्हा उपमुख्यमंत्री छथि। हुनकालोकनिक अतिरिक्त भाजपाक डॉ. प्रेम कुमार, जदयूक विजय कुमार चौधरी, बिजेन्द्र प्रसाद यादव, श्रवण कुमार, हमक संतोष कुमार सुमन आ निर्दलीय सुमित कुमार सिंह शपथ लेलनि।
सूत्र बतौलनि जे बिहारमे नीतीश कुमारक नेतृत्ववला सरकारक मंत्रिमण्डल विस्तार १५ मार्चकेँ होयबाक सम्भावना अछि। सदनक सदस्यक संख्याक अनुसार सरकारमे मुख्यमंत्री सहित कुल ३६ मंत्री भऽ सकैत छथि।
ओम्हर भारतीय जनता पार्टी (भाजपा) शनिदिन बिहार विधान परिषदक लेल अपन तीनटा उम्मीदवारक पहिल सूची जारी कयलक। विधायकक संख्याक आधार पर बिहार विधान परिषदमे भाजपाक चारिटा सीट अछि, मुदा पार्टी एकटा सीट हमक संतोष मांझीकेँ देलक। भाजपा एमएलसीक शेष तीन सीट पर मंगल पाण्डेय, प्रो महेश शर्माकेँ मैदानमे उतारने अछि। लाल मोहन गुप्ता आ अनामिका सिंहकेँ उम्मीदवार बनाओल गेल अछि। ई सभ आइ अपन नामांकन दाखिल करत।
महागठबंधनक पाँचटा उम्मीदवार सेहो आइ विधान परिषदक लेल अपन नामांकन दाखिल करत। विधान परिषदमे राजदसँ नेता प्रतिपक्ष राबड़ी देवी आ पार्टीक वरिष्ठ नेता अब्दुल बारी सिद्दीकीकेँ मनोनीत कयल गेल अछि। अन्य दूटा उम्मीदवार राजद प्रवक्ता उर्मिला ठाकुर आ सैयद फैसल अली छथि।
