बिहार भाजपा अध्यक्ष आ उपमुख्यमंत्री सम्राट चौधरी राजगमे कोनो प्रकारक असंतोषसँ इनकार करैत कहलनि जे पार्टीक वरिष्ठ नेता द्वारा गठबंधनक लोकसभसँ बातचीत चलि रहल अछि। सबसँ गप्प-सप्प केलाक बाद सीटक बंटवाराक घोषणा कएल जाएत।
पटनामे संवाददाता सभसँ बातचीत करैत ओ कहलनि जे बिहारक जनता लालू यादवक बयानकेँ कहियो गम्भीरतासँ नहि लैत अछि। १५ साल धरि सत्ता चलेलाक बाद लालू यादव कहियो गंभीर बात नहिं कयलथि।
बिहारक उप मुख्यमंत्री सम्राट चौधरी कहलनि जे गृह मंत्री अमित शाह अपराधी आ माफिया सभकेँ स्पष्ट रूपसँ संदेश देलनि अछि जे हुनका सभकेँ उल्टा लटकेबाक काज कयल जायत। अपराधीकेँ बख्शल नहिं जा सकैत अछि।
इशारामे बालु माफिया सुभाष यादवक गिरफ्तारीक उल्लेख करैत ओ कहलनि जे गृहमंत्रीक बयानक २४ घण्टाक बाद परिणाम सामने आयल।
राजद नेता तेजस्वी यादव द्वारा लोजपा (राम विलास) प्रमुख चिराग पासवानक बारेमे देल गेल बयानक बारेमे पूछला पर ओ कहलखिन कि तेजस्वी यादव पहिने ई पता कऽ लैथ कि हुनका संग गठबंधनमे के रहय चाहैत अछि।
चिराग पासवानक बयान पर कहलनि कि सभ पार्टीक गठबंधन जनतेसँ अछि। चिराग पासवान सेहो एकटा राजनीतिक पार्टीक नेता छथि, तऽ स्वभाविक अछि कि ओ जनतासँ जुड़ल छथि।
